Jeremias 15 - Biblia ande chib Romani

E orba katar e duk

¹ O Del phenda mange gia: Te thovenape angla mande o Moises ta o Samuel, ni ka avel mi volia gale foroia, trade len mandar, ta te llantar.

² A te puchle tut: ¿Kai ka lla? Phen lenge gia: O Del phenda gia: Ko si te merel, ka merel, ko si te merel po jarni, ka merel po jarni, ko si te merel bokhatar, te merel bokhatar, a ko si te inllaren le phanglo, te inllaren le phanglo.

³ Ta ka bichalav pe lende star dukha, gia phenel o Del: Jarni te mundarel, ta llukela te chinen o mas, ta chiriklia e milosoke, ta zivirinie dive e phuviake te jan ta te zatrin.

⁴ Ta ka cherav tumen te aven e dar katar sa e phuvia e suetoke pala so cherda ando Jerusalem o Manases chavo katar o Ezekias, charo katar o Juda,

⁵ Soke ¿kake ka avel zalba tutar, Jerusalem? ¿Kake ka avel zao pala tute, o ko ka avel te puchel dal si tut pas?

⁶ Tu muklan man, phenel o Del, irisailan palpale, goleke me ka vazdav mo va pe tute ta ka zatriv tut, chinio sem te avel mange gachin zalba.

⁷ Chudiem tumen sargo char suki llik kai e udara e phuviake, ta muklem bi minonengo me foro ta zatrisardem len, a von ni irisaile katar pe bilache droma.

⁸ Cherdem te aven mai but phivlia neko e chisai e moraki, but oma andem pe dea ta pe lenge chaurre ande desudui e lliveseke gole kai zatril, cherdem te perel po foro iek bari dar.

⁹ Jasarda e zor goia kai avila la efta chaurre, pherdilo duk lako lio, lake peli e riat mai oma, avili thodi ando lallao ta ni llanela so ka cherel ta e llene kai ka achen latar ka dav len kai lenge dusmanura te mundaren len e jarniea, gia phenel le o Del.

O profeta urkil

¹⁰ ¡Tesko mange male, kai biandan man te avav iek lleno kai marelpe ta kai jalpe sa e suetoke! Nikada ni liem ta ni liem unllile, a sa e llene proketin man.

¹¹ ¡Te avelpe gia Devla, te na radisardem chuke sukar, te na molisailem chuke pala o dusmano ando vreme katar e duk, ta ande llivesa katar e nuzda!

O Del phenel kai ka dukhavel e Israele

¹² ¿Sai phagel vareko o sastri, o sastri katar o norte ta o tuch?

¹³ Cho barvalipe, cho barvalipe ta chi phuv ka dav le sa e chiriklienge llabe, pala sa o bilachipe kai cherdan.

¹⁴ Ta ka cherav te radi che dusmanonenge ande iek phuv kai ni pinllare soke mi joli phabol sargo e iag upral pe tumenge.

O profeta molilpe e Devleke

¹⁵ Ioi Devla, tu llanele, de tut golli mandar, aide mande ta mar me dusmanonen. Na phen mo bilachipe ande chi bari joli. Tu llane kai pala tute nakhav lallao.

¹⁶ Che alava avena ta me java len, ta cho alav saia mi dragostia ta veselia ande mo lio, soke cho anav phendilo upral pe mande, ioi Gazda Devla kai si tut sa e zor.

¹⁷ Ni sema maskar e llene kai marena espurnia ta ni cherava baripe katar chi poroka, me beslem korkorre soke sema pherdo joli.

¹⁸ ¿Soke ni achela mi duk, ta mi ran ni ni kamela ni iek drab ta ni sastola? ¿Ka ave tu mange sargo e iek ezgoda kai inai chachuni, sargo e paia kai inai kote?

O Del del anglal

¹⁹ Goleke gia phenda o Del: Te irisailan, me ka lacharav tut, ta ka ave angla mande, a te ikandan so si kuch katar so ni mol le, me alava ka liken katar chiro mui. Cher te irinpe von tute, a na tu lende.

²⁰ Ta ka thovav tut ande gava foro sargo iek zido zuralo tuchno, ta ka marenpe tuia, a ni ka dobin tut, soke me sem tuia te arakhav tut ta te braduiv tut, gia phenel le o Del

²¹ Ta ka ikanav tut katar e va e bilachenge, ta ka braduiv tut katar e va e zuralenge.