Jeremias 14 - Biblia ande chib Romani

O Baro sukipe

¹ O alav e Devleko avilo kai o Jeremias, pala o bari sukipe kai saia.

² Achilo zalosno o Juda, ta leke udara achile puste, besle pe phuv, ta asundilo o roipe katar o Jerusalem.

³ E glamne bichalde pe slugen kai o pai, resle kote kai chidiniaola o pai ta o pai sukiloia, irisaile ta ande pe burura chuche, lallaile, ni llanena so ka cheren ta ucharde po soro.

⁴ E phuv putaili soke ni diapeke ando foro, e llene kai radin e phuv ni llanena so ka cheren ta ucharde po soro.

⁵ E sierve bianena pe umalia ta mukena pe minonen chudine soke ni saia char te jan.

⁶ E magarchura e burdoke likena chak upre, sungana e balav sargo llukela dive, lenge akha korraona soke ni saia char.

O profeta molilpe e Devleke pala o foro

⁷ ¡Ioi Devla! cher e ezgode pala o volipe kai si tut pe cho anav, I te avela kai amaro bilachipe muril amen, soke amari dos cherdili mai bari ta cherdam chuke o bilachipe

⁸ Tu san so aduricharel o Israel, tu arakhe le ando vreme katar e duk, ¿Soke cherdilan sargo katar inai tut phuv, sargo gua kai phirel e phuvia ta duriol ta thovelpe te sovel?

⁹ ¿Soke san sargo iek lleno darano, ta sargo tromano kai nasti braduil nika? A tu Devla, san maskar amende ta pe amende si ikhardo cho anav, na muk amen korkorre.

¹⁰ O Del phenda gia katar gava foro: Gachin avila lenge drago te llan pe suako rig, ta lenge porrne ni achile, goleke o Del ni veselilpe pala lende, ka delpe golli katar lengo bilachipe ta ka dukhavel len.

¹¹ O Del phenda mange gia: Na molisao pala o lachipe katar gava foro.

¹² Kana ka cheren o alluno, me ni ka asunav kai roven, ta kana ka cheren kurbano phabardo ta ezgode dine ni ka lav le. Ka zatriv len e jarniea, e bokhaia ta e nasualimaia.

¹³ Ta me phendem: ¡Ioi Devla kai san amaro Gazda! E poraukura phenen lenge Kai ni ka dikhen o jarni, ta kai ni ka avel bok maskar lende, ta kai pe gava than ka de len e chachuni pas.

¹⁴ Ondaka o Del phenda mange gia: E poraukura kojaven ande mo anav, me ni bichaldem len, ni phendem lenge, ta ni diem lenchar orba, dikhen sargo sune kojamne, apogodin, von phenen tumenge iek poroka kojamno kai ni mol la niso.

¹⁵ Goleke, o Del phenel katar e poraukura kai ni bichalda vou ta kai den orba ande leko anav ta phenen kai ni o jarni ni e bok ni ka avel ande gaia phuv, a isto von, e poraukura, ka aven zatrime e jarniea ta e bokhaia.

¹⁶ Ta gua o foro kai von phende lenge goia poroka, ka avel chudino pe droma katar o Jerusalem pala e bok ta o jarni, ta ni ka avel ko te prajol len, lenge diskinien, lenge chaurren ta lenge chorren, ta pe lende ka chucharav lengo bilachipe.

¹⁷ Tu ka phene lenge gala alava: Te peraven ma akha ausa sorro llive ta sorro riat ta te na achen, soke bari duk nakhel e chei katar mo foro, iek nasualipe but dukhado.

¹⁸ Te likav pe umal, dikhav mule e jarniea, a te dav ando foro, nasuale bokhatar, goleke e poraukura ta e popura phirde pe phuv, ta ni acharde.

O profeta del orba e Devlea

¹⁹ ¿Muklan chudino sa e Judae? ¿Murzi sa che liea po Sion? ¿Soke dukhadan amen bi te avel iek drab? Adurichardam e pas, ta ni avilo o lachipe, aduricharaia te sastiva, ta darailam.

²⁰ ¡Ioi Devla! Llana kai sam bilache ta kai i amare papura sea bilache soke cherdam chuke o bilachipe.

²¹ Pala o volipe katar cho anav na chide amen, ta na muk ando lallao cho glamno trono, de tut golli ta na phag o alav kai si tut amenchar.

²² ¿Si maskar e dela e phuvienge iek kai cherel te delpeke? ¿Ni san tu amaro Del? Goleke adurichara tutar, tu cherdan sa gala ezgode.