Jeremias 13 - Biblia ande chib Romani

E orba katar e duk e Israeleki

¹ Gia phenda mange o Del: Lla ta chin chuke iek kavisi cherdo katar o lino, ta phande le pe cho maskar ta na thov le ando pai.

² Ta chindem o kavisi prema sar phenda mange o Del, ta phanglem le pe mo maskar.

³ Pale phenda mange o Del:

⁴ Le mo kavisi kai chindan, kai si phanglo pe cho maskar, uste ta lla karing o Eufrates ta guruv le ando chindipe katar iek pechina.

⁵ Ondaka llelem ta gurudem le para o Eufrates, gia sar phenda mange o Del.

⁶ Ta kana nakhle but llivesa, o Del phenda mange gia: Uste ta lla karing o Eufrates ta le o kavisi kai phendem chuke te guruve kote.

⁷ Ondaka llelem karing o Eufrates ta anadem, ta liem o kavisi katar gurudem le, a o kavisi cherniloia, ta ni trubula nisoke.

⁸ Ta o Del phenda mange:

⁹ O Del phenda mange gia: Gia ka cherav te cherniol o baripe katar o Juda, ta o istardipe katar o Jerusalem.

¹⁰ Gava bilacho foro kai ni kamel te asunel me alava, ta kai cherel pe piro, ta kai llal pala e dela katar aver phuvia, radil lenge ta del changenchar angla lende, ka cherdol sargo gava kavisi, kai inai lacho nisoke.

¹¹ Soke isto gia sar o kavisi lipilpe pe esnaga e manuseki, gia cherdem te avel pasa mande sa e phuv katar o Israel ta sa e phuv katar o Juda, gia phenel le o Del, ta sai aven mange foro ta familia, blagosipe ta liubao, a ni asunde.

Aver orba katar e duk kai si te avel

¹² Goleke ka phene lenge gala alava: Gia phenda o Gazda, o Del katar o Israel: Suako bure ka pherdol mol ta. Ta von ka phenen chuke: ¿Ni amen llana kai sa e burura ka pherdon mol?

¹³ Ondaka ka phene lenge: Gia phenda o Del: Me ka matarav sa e llenen kai zivin ande gaia phuv, ta e charonen katar e vicha e Davideki kai besen pe leko trono, e poponen ta e profetanen, ta sa e llenen kai zivin ando Jerusalem,

¹⁴ ta ka cherav te marenpe iek averea, ta i e dada pe chavenchar, gia phenel le o Del, ni ka prostiv, ta ni ka avel mange zalba ni volipe ni zao te na zatriv len.

Phendol e Israeleke so ka avelpe letar

¹⁵ Asunen ta thoven sama, na cheren baripe soke o Del dia orba.

¹⁶ Blagosin e Gazda tumaro Del, mai anglal te cherel te avel o truniariko, mai anglal te eskonban tumare porrne pe burdura katar o truniariko ta te aduricharen o villelo kai ka cherel le tumenge senka merimaki.

¹⁷ A te na asunden gaia orba, ka rovav po chorial pala tumaro baripe, ta me akha ka pherdon ausa, ka rovav bare ausenchar soke phangle e stoka e Devleki.

O Del bichalel te phenen e charoke

¹⁸ Phen gia e charoke ta e charoinake: Chuden tumendar o baripe, besen pe phuv, soke e korona katar tumaro gazdaripe pelitar katar tumare sore.

¹⁹ Phangle forura katar o Negev, ta ni saia ko te putarel len, sa o Juda inllarde le ta phangle le.

²⁰ Vazden tumare akha ta dikhen golen kai aven katar o norte. ¿Kaitali e stoka kai avila chuke dini, kaitalo cho sukar pero?

Phendol kai ka inllaren phanglo e Israele

²¹ ¿So ka phene kana vou ka thovel te gazdarin pe tute golen kai tu sikadan te aven che amal? ¿Ni ka cheren te dukhal tut zurale sargo iek diskinia kai si te maladol lake?

²² Te phendan ande cho lio: ¿soke nakhav gaia ezgode? Pala cho baro bilachipe vazdie cho fistano, pucharde che porrne.

²³ ¿Sai pharruvel pi morchi o etiope, ta po makhlipe o leopardo? Isto gia tumen, ¿sai cheren o lachipe kana sen sikade te cheren o bilachipe?

²⁴ Goleke me ka rispiu tumen pe balav katar o pusto sargo e char suki kai nakhel

²⁵ E gaia ka avel chi baj, so me chinadem chuke, gia phenel le o Del, soke bristrailan mandar ta uzdisailan ando kojaipe.

²⁶ Goleke me, ka ikanav tutar cho fistano ta ka dikhol cho lallao,

²⁷ cho kurvaluko, cho urkipe, o bilachipe katar cho kurvaluko kai cherea pe burdura, pe umalia dikhlem o gadope kai cherea. ¡Tesko chuke Jerusalem! ¿Ni ka ave chisti? ¿Gachin ka nakhel te chisto tut?