Jeremias 12 - Biblia ande chib Romani

O profeta del orba e Devlea

¹ ¡Ioi Devla! tu san chacho, ¿sar ka jav man tuia? A ka phenav chuke mi orba. ¿Soke llal sukar e bilachenge, ta si len lachipe gola kai ni kanden tut?

² Thodan len ande phuv, ta barile lenge zile, barile ta die septelie, von phenen cho anav, a tu san dur katar lengo lio.

³ A tu Devla, pinllare man, dikhlan man, ta zumadan mi lio tuia, chirde len sargo bakren kai mundardon, ta chinav len e lliveseke katar o mundaripe.

⁴ ¿Gachin ios ka achel pusti e phuv, ta suki e char katar sa e umal? pala o bilachipe katar gola kai zivin kote, si sea zivirinie ni chiriklia, soke von phende: O Del ni ka dikhel amaro son.

O Del del anglal

⁵ Te prastian golenchar kai llan peske, ta te chiniarde tut, ¿Sar ka praste golenchar kai llan pe gra? A te sana ande esmiro ande phuv katar e pas, ¿sar ka chere maskar e patra katar o Jordan?

⁶ Soke i che phlal ta o cher che dadeko, i von vazdinaile pe tute, i von urkisarde pe tute, ta na pacha len kana ka den tuia orba postenimaia.

E Devleke si zalba pala so nakhel leko foro

⁷ Muklem me foro, mi phuv achili korkorre, diem so voliva ande va katar lenge dusmanura.

⁸ Mi phuv si mange sargo iak liono ando vos, baslo pe mande, goleke murzisardem pe lete.

⁹ Mi phuv si sargo iek chirikli kai si sukar lako makhlipe ta aver chiriklia furian truial latar te jan la, aven, chidiniaon, tumen sa zivirinien dive katar o vos, aven te jan la.

¹⁰ But chobanura zatrisarde me drakha, ustade mi phuv, mukle sargo o pusto mi sukar phuv.

¹¹ Mukle la ande zatrania, ta rovda pe mande zalbaia, zatrisarde sa e phuv, soke ni saia ko te mislilpe.

¹² Pe sa e thana vazdine katar o pusto thodepe llene kai zatrin, soke o jarni e Devleko ka zatril katar iek rig e phuviaki llik kai ogoia rig, ni iek lleno ni ka avel ande pas.

¹³ Thode te bariol o lliu, ta ikande karrne, saia len e phuv, a ni dobisarde niso, ka avel lenge lallao katar lenge septelie, pala e joli e Devleki kai phabol.

O Del del po alav e kai e forura kai si pasa o Israel

¹⁴ Gia phenda o Del sa e bilache llenenge kai zivin angla e phuv kai cherdem te avel me foro o Israel: Me ka ikanav len katar lengi phuv, ta ka ikanav lendar e foro e Judaeko.

¹⁵ Ta kana ka ikanav len, ka iriu man ta ka avel mange zalba lendar, ta ka cherav te irilpe suako iek ka po foro ta kai pi phuv.

¹⁶ A te sikile chachimaia o drom me foroko, te jan sovel ande mo anav, ta te phenen: Ando anav e Devleko, gia sar sikade me foro te jal sovel ando anav katar o Baal, ka llal lenge sukar maskar mo foro.

¹⁷ A te na asunde, ka chirdav gole foro ta ka ikanav le zilenchar ta ka zatrui le, gia phenel le o Del.