Jeremias 11 - Biblia ande chib Romani

Phagen o alav

¹ O Del dia orba karing o Jeremias ta phenda leke:

² Asun so phenen gala alava, ta de orba suakone murusea katar o Juda ta suakone llenea kai zivil ando Jerusalem.

³ Ta ka phene lenge gia: Gia phenda o Gazda o Del katar o Israel: Proketo te avel o lleno kai ni ka kandel e alava katar gava alav,

⁴ kai diem tumare paponen kana ikandem len katar o Ejipto, katar e furnava sastruni ta phendem lenge: Asunen mo avazi, ta cheren me alava, prema sa so phenav tumenge, ta ka aven mo foro, a me ka avav tumaro Del.

⁵ Te sai chereu o alav kai diem tumare paponen, kana phendem lenge kai ka dav len e phuv kai si la o thud ta o aullin, sargo ande gava llive. Ta phendem: ¡Ioi Devla! gia te avelpe.

⁶ Ta o Del phenda mange: Phen sa gala alava ande forura katar o Juda ta pe droma katar o Jerusalem, ta phen gia: Asunen pe so ka achel gava alav, ta cheren le.

⁷ Soke diem pe tumare papura omanglal kana ikandem len katar o Ejipto, ta ni achilem te phenav llik akana: Asunen mo avazi.

⁸ A ni asunden, ta ni thoden sama, suako lleno mangla te llal pala so mangla leko bilacho lio, goleke ka cherav te peren pe lende sa e alava katar gala sovlia kai phendem te cheren, ta ni cherde.

⁹ Ta o Del phenda mange: E llene katar o Juda ta maskar e llene katar o Jerusalem, thode te denpe orba te na kanden man.

¹⁰ Cherde o bilachipe kai cherena lenge purve papura, kai ni kamle te asunen me alava ta llele pala e Dela katar aver phuvia te radin lenge, o Israel ta o Juda phagle mo alav, kai achilema lenge paponenchar.

¹¹ Goleke o Del phenda gia: Me anav pe lende iek bilachipe kai nasti ka liken letar, ta ka mangen mandar a me ni ka asunav len.

¹² Ta ka llan e forura katar o Juda ta e llene kai zivin ando Jerusalem ta ka mangen katar e dela kai von phabaren lenge o taimano, a nasti ka braduin len katar o bilachipe kai nakhen.

¹³ ¡Ioi Juda! Soke prema gachin sea che forura, isto gachin saia che dela, ¡Ioi Jerusalem! Prema gachin sea che droma, isto gachin thodan e altarura katar o lallao, altarura te phabarena o taimano karing o Baal.

¹⁴ Goleke na molisao pala gava foro, ta na cher roipe ni molipe soke ando llive kai ka molinpe mange pala pi duk, me ni ka asunav.

¹⁵ ¿Pe so gazdaril ande mo cher goia kai voliu la, a vou cherda gachin ezgode gado? ¿Tu misli kai e kurbanura ta o mas katar e zivirinie kai molisailan pe lende ka achaven e duk kai si te le? ¿Ta golea ka veseli tut?

¹⁶ Kas e maslinkengo zeleno, leke septelie si sukar ta dikhol sukar, gia ikharda tut o Del. Ande iek avazi zuralo cherda te phabol iag upral pe lete, ta phagla leke krangura.

¹⁷ Soke isto o Del kai si le sa e zor kai thoda tut ande phuv te bario, proketisarda tut, pala o bilachipe kai cherda o Juda ta o Israel, soke ni achen te phabaren o taimano karing o Baal.

E dusmanura katar o Jeremias mangen te mundaren le

¹⁸ Tu Devla cherdan te llanav le, ta pinllardem le, ondaka cherdan te dikhav so cherda.

¹⁹ Ta me sema sargo iek bakro kai inai dosalo kai inllaren le te mundaren le, soke ni llanava kai denape orba so te cheren manchar, ta phenena: Zatrisara o kas ta leke septelie, ta china le katar e phuv golengi kai zivin, te na delpe golli letar niko.

²⁰ A tu kai san o Del kai si tut sa e zor, kai chine e kris chachi, kai pinllare o mislo ta o lio, te dikhav sar dukhave len, soke angla tu phendem mi orba.

²¹ Goleke gia phenda o Del cheres e murusa katar o Anatot kai roden te mundaren tut ta phenen: Na phen e poroka ando anav e Devleko, te na nundara tut,

²² goleke phenda gia o Del kai si le sa e zor: Me ka dukhavav len, e ternen ka mundaren len e jarniea, lenge chaurre ta lenge chorra ka meren bokhatar,

²³ ta ni ka achel niko lendar, soke me ka anav o bilachipe murusa katar o Ananot, ando burs katar lengi duk.