Jeremias 10 - Biblia ande chib Romani

Aver dela ta o blagosipe karing o Del o chachuno

¹ Asunen so phenda o Del tumendar, foro katar o Israel.

² Gia phenda o Del: Na sikon so cheren e phuvia, ta na daran katar e ezgode kai dikhon ando miloso i te darana lendar e phuvia.

³ Soke e ezgode kai si sikade e phuvia ni mol len niso, soke chinde iek kas katar o vos ta cherde len e churiaia.

⁴ Rup ta sunakai thoven pe lende, e chokanoia maren e kafra pe lende te chapenin len te na miskonpe.

⁵ Orta dikhon sargo iek kas ta ni den orba, inllaren len soke nasti phiren. Na dara lendar soke nasti cheren o bilachipe, ta inai len e zor ni te cheren o lachipe.

⁶ Inai ni iek sargo tu Devla, tu san baro, ta cho anav si baro ta gazdaril.

⁷ ¿Ko ni ka daral tutar, Charo e phuviengo? soke tutar si te dara, soke maskar sa e bizai katar e phuvia ta ande sa lenge charoine, inai niko sargo tu.

⁸ Saurre ka cherdon besne ta ka diliaon soke ni mol niso so sikavel iek kotor kas.

⁹ Katar o Tarsis ka anen kotora rup ta sunakai katar o Ufaz, e manusa cherde len, pe vastenchar cherde len e llene kai bilaven, ka thoven pe lende patave vunete ta lole, sa si cherdo katar e llene kai llanen.

¹⁰ A o Del si o Del chachuno, vou si o Del llundo ta Charo ostade, e phuv izdral kana vou joliaol, ta e phuvia nasti terpin leki joli.

¹¹ Ka phenen lenge gia: E dela kai ni cherde ni o miloso ni e phuv, te na aven ios pe phuv telal katar o miloso.

Llili kai blagosil e Devle

¹² Gua kai cherda e phuv pe zoriaia, gua kai thoda e phuv pe po than pe llanglimaia, ta buliarda o miloso pe bizaimaia,

¹³ kana del orba asundon e bare paia ando miloso, ta duratar katar e phuv vazdiniaon e oblakura, cherel e esterliche te anen o bursin ta ikanel e baliava kai si gurudine.

¹⁴ Sa e manusa si besne, ta inai len bizaipe, o lleno kai bilavel o rup lallal pala po del soke kojamno si so cherda katar so bilada,

¹⁵ von si ezgode kai ni mol len niso, iek ezgoda dili, kana ka avel lenge o vreme katar e duk ka aven zatrime.

¹⁶ A o Del katar o Jakob inai gia, soke vou si o Del kai cherda sa, ta o Israel si gua kai ka achel leke e phuv, o Del kai si le sa e zor gua si leko anav.

O profeta ta o foro denpe orba

¹⁷ Chide katar e phuvia che ezgode, tu kai zivi po than maskar e zidura.

¹⁸ Soke o Del kai si le sa e zor phenda gia: Akana ka chudav dur sargo iek barr e llenen kai zivin pe phuv, ta ka thovav len ande nuzda, te dukhal len.

¹⁹ ¡Tesko mange pala mi duk! mi ran si but dukhadi, A me phendem: Chachimaia gava si mo nasualipe, ta trubul te dukhavel man.

²⁰ Mi chara si zatrime, me chilodoria si sa chinde me chaurre mukle man ta mule, inai man ko te inzarel mi chara, ta inai ko te phandel e chitura.

²¹ Soke e chobanura ni sea bizai ta ni rodie e Devle, goleke ni llela lenge sukar, ta sa lengi stoka rispisaili.

²² Avel iek buna, ta bari burkania avel katar phuv katar o norte, kai ka mukel sargo o pusto sa e forura katar o Juda, sargo o than katar e llukela dive.

²³ ¡Ioi Devla! llanav kai o manus inai gazda pe po drom, ta kai o manus ni ortol pe estope.

²⁴ ¡Ioi Devla! Dukhav man che krisaia, na che jolinaia, ta na zatri man.

²⁵ Chude chi joli pe llene kai ni pinllaren tut, ta pe phuvia kai ni molinpe chuke, soke jale e Jakobo, nakhade le, bilade le ta zatrisarde leko than.