Jeremias 1 - Biblia ande chib Romani

Gia llal angle o lil

¹ E alava katar o Jeremias chavo katar o Jilkias, katar e popura kai sea ando Anatot, ande phuv katar o Benjamin,

² Alav e Devleko kai avilo ande llivesa katar o Josias chavo katar o Amon, charo katar o Juda, ando burs desutrito katar leko gazdaripe.

³ Ta avilo lete o alav e Devleko ande llivesa katar o Joakim chavo katar o Josias, charo katar o Juda, llik kai o son katar o burs desuiekto katar o Sedekias chavo katar o Josias, charo katar o Juda llik kana inllarde len phangle katar o Jerusalem ando chon panchto.

O Del ikharel e Jeremiase

⁴ O Del dia manchar orba ta phenda:

⁵ Mai anglal te cherav tut ando lli pinllardem tut, ta mai anglal te biando blagosisardem tut, thodem tut te ave profeta e phuviengo.

⁶ Ta me phendem leke: ¡Ioi, Gazda, Devla! Me ni llanav te dav orba soke sem minono.

⁷ Ta o Del phenda mange: Na phen kai san minono, soke kaigo ka bichalav tut tu ka lla, ta ka phene sogo ka phenav chuke me.

⁸ Na dara lendar, soke me sem tuia te braduiv tut, gia phenel le o Del.

⁹ Ta o Del inzarda po va ta dodisarda mo mui ta phenda mange:

¹⁰ Akana thodem me alava pe che us. Allive thodem tut upral pe phuvia ta pe charoine, te zatri ta te muri, te phage ta te perave, te vazde ta te thove e simiche ande phuv.

¹¹ O Del dia manchar orba ta phenda mange: Jeremias, ¿so dikhe tu? Ta me phendem: Dikhav iek ran katar o almendro.

¹² Ta o Del phenda mange: Sukar dikhlan, soke me sigarav te cherdol so phenav.

¹³ O Del dia manchar orba pale o duito ta phenda mange: ¿So dikhe tu? Ta me phendem: Dikhav iek kavi kai chirol, ta lako mui si karing o norte.

¹⁴ Ondaka o Del phenda mange: Katar o norte ka mukliardol o bilachipe pe sa e manusa kai zivin pe gaia phuv.

¹⁵ Soke me ka ikharav sa e phuvien katar e charoine kai si ando norte. Ka aven ta ka inzaren pe chare angla e udara katar o Jerusalem, ta ka thovenpe tronura truial katar sa leke zidura ta pe sa e forura katar o Juda, gia phenel le o Del.

¹⁶ Ta pala sa lengo bilachipe, ka chinav mi kris pe gola kai mukle man, ta kai phabarde taimano avere delenge, ta blagosisarde so cherde pe vastenchar.

¹⁷ Goleke tu, lachar tut, uste ta de lenge orba sa so diem tut te phene lenge, na dara lendar, te na peravav tut me angla lende.

¹⁸ Soke allive me thodem tut sargo iek sargo iek foro kai si sa ande zidura, sargo direko sastruno, ta sargo zido tuchno angla sa gaia phuv, ta angla sa e charura katar o Juda, ta lenge sudura angla lenge popura ta angla o foro e phuviako.

¹⁹ Ta ka marenpe tuia, a ni ka dobin tut, soke me sem tuia te braduil tut, phenel o Del.