Jageo 2 - Biblia ande chib Romani

¹ Ando bis ta iek llive katar o eftato chon, o Del dia orba katar o profeta o Jageo, ta phenda:

² Phen e Zorobabeleke chavo katar o Salatiel kai gazdaril ando Juda, ta e Josueke chavo katar o mai baro popo o Josadak, ta sa e foroke gia:

³ ¿Ko tumendar dikhla o baripe katar o purvo cher ta dikhel o cher sar si akana? ¿Inai sargo niso angla tumare akha?

⁴ Goleke, Zorobabel le chuke zor, ta i tu Josue chavo katar o Josadak le chuke zor, ta sa o foro e phuviako. Radisaren, soke me sem tumenchar, phenel o Del kai si le sa e zor.

⁵ Isto gia sar me achilem po alav tumenchar kana likisten katar o Ejipto, mo duo ka avel tumenchar. Na daran.

⁶ Gia phenel o Del kai si le sa e zor: Cherricha ios ka cherav te dermolpe o miloso ta e phuv, e mora ta e phuv suki.

⁷ Ka cherav te dermonpe sa e phuvia, ta ka avel so mai zelin sa e phuvia, ta ka pherav barimaia gava cher, phenel o Del kai si le sa e zor.

⁸ O rup si murno ta murno si o sunakai, phenel o Del kai si le sa e zor.

⁹ O baripe katar gava cher ka avel mai baro neko o purvo cher, phenel o Del kai si le sa e zor. Ta ka dav e pas pe gava than, phenel o Del kai si le sa e zor.

¹⁰ Ando bis ta starto llive katar o iniato chon katar o duito burs e Darioko, o Del phenda e profetake o Jageo gia:

¹¹ Gia phenel o Del kai si le sa e zor: Puchen e poponen cheres o zakono gia:

¹² Fiko te inllarela mas dino e Devleke ulime ande po gertachi, a o gertachi te dodila marrno, zumi, zeitino, o fisavo aver jape, ¿Ka achen dine e Devleke? Ta e popura vacharde: Iok.

¹³ Ta o Jageo phenda: Te si kai iek lleno achilo pokalime soke dodisarda iek esnaga muli, ta dodila iek andar gola ezgode ¿Ka achen pokalime? Ta e popura vacharde: Ka achen pokalime.

¹⁴ Ta o Jageo phenda: Gia si gava foro ta gala llene angla ma, phenel o Del. Isto gia sa so cheren pe vastenchar, ta sa so den kate, si pokalime.

¹⁵ Mislin tumen ande gaia ezgoda mai anglal te thoven bar po bar ando cher e Devleko.

¹⁶ Mai anglal te nakhen gala ezgode, rodena bis breche lliu ta malavena samo des. Rodena pinda piria mol, ta malavena samo bis.

¹⁷ Me cherdem te aven muke ta te perel krupe pe sa tumaro rado, a tumen ni irisaile mande. Me o Del phenav le.

¹⁸ Mislin tumen ande tumare lie katar angle. Allive si o bis ta starto llive katar o iniato chon, ta thode e barra kai si telal ando cher e Devleko.

¹⁹ Llik akana inai tumen lliu kote kai guruven le. Ni ios ni den e kasta septelie drakhake, e kasta simochinenge, e granade ta e kasta maslinkenge. A me ka blagosiv len.

²⁰ Pale o duito o Del dia orba e Jageoke isto ande gua llive, ta phenda leke gia:

²¹ Phen gia e Zorobabeleke o gazda katar o Juda: Me ka cherav te dermonpe o miloso ta e phuv,

²² ka peravav o trono katar e charoine ta ka zatriv e zor katar e charoine e phuviake. Ka zatriv lenge bordona marimake ta ka meren e gra ta o boñikura kai llan pe lende. Suako iek ka mundarel pe phale e jarniea.

²³ Ande gua llive, tu Zorobabel chavo katar o Salatiel kai san mo sluga, ka thovav tut sargo sello, soke me esvirisardem tut. Me o Del phenav le.