Jageo 1 - Biblia ande chib Romani

O Del phenel te vazden o cher e Devleko

¹ Ando duito burs katar o charo o Dario, ando purvo llive katar o souto chon, o Del dia orba katar o profeta o Jageo e Zorobabeleke chavo katar o Salatiel, gazda katar o Juda, ta e Josueke chavo katar o Josadak kai saia baro popo,

² ta o Del kai si le sa e zor phenda lenge gia: Gava foro phenel kai ni avilo o vreme te vazden pale o cher e Devleko.

³ Ondaka o Del phenda e Jageoke:

⁴ ¿Tumenge si o vreme te zivin ande chera glamne, a mo cher si sa peradino?

⁵ O Del kai si le sa e zor phenel tumenge gia: Mislin tumen ande so cheren.

⁶ Thoven but simiche ta ni chiden but septelie. Jan ta ni chalion, pien ta achen trusale. Thoven pe tumende patave ta ni taton. O lleno kai radil thovel so pochinen leke ande iek ambava pharradi.

⁷ O Del kai si le sa e zor phenel tumenge gia: Mislin tumen ande so cheren.

⁸ Llan karing o burdo te anen kasta te sai vazden pale o cher, ta ka thovav ande lete mi volia, ta ka blagosin man, phenel o Del.

⁹ Tumen roden but ta malaven cherrichai. Ta so guruven ando cher, me ka phurdav minoni balav ta ka rispiuv le. ¿Soke? Soke mo cher si peradino, a tumen samo brigin tumen pala tumare chera.

¹⁰ Goleke ni delpeke ta e phuv ni del e septelie.

¹¹ Me cherdem te na delpeke pe vostanura, pe burdura, po lliu, pe mol, po zeitino, pe sa e septelie kai del e phuv, pe murusa, pe zivirinie, ta pe sa o rado kai cheren le e vastenchar.

¹² Ta o Zorobabel chavo katar o Salatiel, o Josue chavo katar o baro popo o Josadak, ta sa o foro asunde e alava e Devleke kai o Jageo phenda lenge, ta sa daraile e Devletar.

¹³ Ondaka o Jageo, bichaldo e Devletar, dia orba e foroke ando anav e Devleko, ta phenda gia: Me sem tumenchar, phenel o Del.

¹⁴ Ta o Del cherda te llungadol o duo katar o Zorobabel, ta katar o Josue chavo katar o baro popo o Josadak, ta katar sa o foro, ta avile te radin ando cher e Devleko kai si le sa e zor.

¹⁵ Ando bis ta starto llive katar o souto chon katar o duito burs sar kana thodape te charoil o charo o Dario.