Jabakuk 3 - Biblia ande chib Romani

O molipe katar o Jabakuk

¹ Molipe katar o Jabakuk, ando Sigionot.

² Devla, asundem cho alav ta darailem. Cher ande amaro zivoto che bare ezgode kai cherdan omanglal, te sai pinllara len i amen. Sikav gia chi zalba makar avea joliariko.

³ O Del ka avel katar o Teman, katar o burdo Paran avel o Del Santo. Leki dragostia ucharda e miloso, ta o sueto pherdilo katar o llilabipe kai blagosil.

⁴ Avilo ando baro villelo. Katar leko va likena esterliche, kote saia gurudini leki zor.

⁵ Angla le llala o meripe. Ta palape mukel o baro nasualipe.

⁶ Ustilo, ta llinda e pole katar e phuv. Dikhla ta cherda te izdran daratar e llene. E purane burdura achile sa ande kotora, E burdura purane peren, a e droma e Devleke si ostade.

⁷ Dikhlem e chare katar o Kusan ande bari nuzda. E chare katar o Madian dermosaile

⁸ ¿Jolailan Devla pe paia? ¿Pe paia jolailan? ¿Chi joli saia pe mora kana llelan pe che gra, ta pe che bordona kai dobin?

⁹ Cho arko saia lachardo. Cho alav kai dian e vichen saia chacho. Putardan e phuv e paiea.

¹⁰ E burdura daraile kana dikhle tut. Nakhle but paia. Ta asundile e paia kai si telal katar e phuv. Bare valura likena upre.

¹¹ O kham ta o chon achile pe po than. Llele pe che llide kai klichina, ta po villelo katar chi lansa.

¹² Jolinaia ustadan e phuv, silnomaia ustadan e foronen.

¹³ Likistan te pomozi che foro, te pomozi gole kai esvirisardan. Peradan o soro katar o cher e bilacheko, te sai dikhol llik e barra kai si telal katar leke zidura.

¹⁴ Jiradan isto lenge llidenchar lenge sore, kai sargo bursin die pe ma te rispi man ta veselinape sargo kana zatrin e chorren po chorial.

¹⁵ Phirdan pe mora lenge grastenchar, upral pe bare paia.

¹⁶ Kana asundem sa gala ezgode darailem. Izdrana me us, chernipe dia ande me kokala ta sa mi esnaga achili bi zoriaia. A me ka avav smiro ando llive katar e bari dar, kana ka aven e boñikura kai ka den ande amari phuv.

¹⁷ Makar e simochina ni dela lulunlla ta ande vostanura drakhake ni avena septelie, ta te na likena e maslinke. Ta katar e vostanura ni chidena lliu i te na avena ande rindura ni bakre ni guruva,

¹⁸ me ka veseliv man ando Del, mi veselia ka avel o Del, o Del katar mo braduipe.

¹⁹ Soke o Del si mi zor, cherel me porrne sargo katar o siervo, ta inllarel man pe thana kai si upre.