Jabakuk 2 - Biblia ande chib Romani

¹ Ka prezou ta ka arakhav sargo o boñiko kai arakhel upral pe zidura, te dikhav so ka phenel mange o Del cheres mi nuzda kai phenav.

² Ta o Del phenda mange: Pisisar pe table so ka sikavav chuke, te sai chitin le sukar.

³ Makar e poroka ni ka cherdol oma, ka avel o vreme kana ka cherdol. Adurichar, i te dikhola kai ni avel, soke ni ka nakhel ios vreme ta ka cherdol.

⁴ O lleno kai inai orta, istardol. A o lleno orta ka zivil pala po pachape.

⁵ Ta o lleno kai drago leke o pipe si dusmano, si lleno kai istardol ta ni ka llal leke sukar. Putarel po mui sargo o limori, ta ni chaliol, sargo o meripe kai ni chaliol, goleke chidia sa e llenen, ta chidia peke sa e phuvien.

⁶ A sa e phuvia kai vou lia ka maren espurnia letar, ta ka phenen leke gia: ¡Tesko goleke kai barvalio katar e ezgode kai ni sea leke! ¿Gachin ios ka chidelpeke o barvalipe kai inai leko?

⁷ ¿Ni ka aven pe tute kana ni ka llane gola kai san lenge unllile, ta ka llungaven tut e llene kai ka daraven tut ta ka muken tut nango?

⁸ Soke tu lian katar but phuvia, ta sa ogola phuvia ka len tutar, ka cheren te pochine pala e llene kai mundardan, pala sa so chordan katar e phuvia, katar e forura ta katar sa e llene kai zivin ande lende.

⁹ ¡Tesko chuke kai pherdan cho cher e ezgodenchar kai lian kojaimaia, te sai gurudo katar suako bilachipe!

¹⁰ Cherdan te achel ando lallao cho cher, zatrisardan bute phuvien ta cherdan o bilachipe che zivotoke.

¹¹ Soke i o barr katar e zidura ta e kotora kastune ka urkin pe tute.

¹² ¡Tesko chuke kai vazde forura e ratea katar e llene kai mundare!

¹³ O Del kai si le sa e zor, ka cherel te na blazil niso cho rado soke ka phabarel le sa ande iag.

¹⁴ Soke e phuv ka avel pherdi katar o sikadipe katar e zor e Devleki, sargo e mora kai si pherdi katar o pai.

¹⁵ ¡Tesko chuke kai de te pie avere llenen! ¡Tesko chuke kai de len te pie mol lachardi te sai dikhe lengo nangipe!

¹⁶ Pherdilan lallao mai but neko liubao. O Del ka cherel te pie i tu iek taso, ta i chiro nangipe ka dikhol ta chi dragostia ka cherdol lallao.

¹⁷ Soke o choripe kai cherdan ando Libano ka perel pe tute. Ka dara pala o mundaripe katar e zivirinie, ka dara pala e llenen kai mundardan, ta o silnope kai cherdan ande phuvia, ta e forura kai lian.

¹⁸ ¿So blazil e slika e lleneke kai cherda la? ¿Pala so si iek slika kai samo inllarel iek kojaipe? E slike nasti den orba ¿A sar ka uzdilpe ande lende o lleno kai cherda len?

¹⁹ ¡Tesko chuke kai phene iekhe kasteke te llungadol, ta iekhe barreke, te thovelpe pe porrne! ¿Vou sai sikavel? Vou si mardo ando sunakai ta o rup ta ande le inai duo.

²⁰ A o Del si ando po santo cher. ¡Sa phuv te na del orba angla le!