Jabakuk 1 - Biblia ande chib Romani

¹ E poroka kai dikhla o profeta Jabakuk.

² ¿Gachin ios Devla, ka urkiv te pomozi man, ta ni ka asune man? ¿Gachin ios ka urkiv pala o silnope ta ni ka bradui amen?

³ ¿Soke chere te dikhav gachin duk ta bilachipe? Angla ma si e zatrania ta o silnope, pe suako rig marenpe.

⁴ Ni cheren so phenel o zakono, ni chinen e kris chachimaia, o bilacho rodel te dukhavel e lache, goleke bangaren o chachipe.

⁵ Dikhen tumen e phuvia kai si truial, chudin tumen ta daran, soke ande tumare llivesa ka cherav iek ezgoda kai i te phenena la vareko tumenge, ni ka pachan la.

⁶ Ka cherav te vazdiniaon pe tumende e kaldeura kai si llene kai inai lenge zao ta si sigarde te llan pe suako rig katar o sueto te len averenge phuvia.

⁷ Von si zurale ta daraven, ta cheren samo so phenel lengo zakono.

⁸ Lenge gra prasten mai zurale neko e leopardura, ta si mai dive neko e ruva kai liken orachaia. Si len but murusa kai llan pe gra ka aven duratar te marenpe sargo e agila kana perel pe iek zivirinia.

⁹ Von zatrin sa so si po drom, ta daraven kana aven, ta inllaren e llenen phangle, gachin sargo e chisai moraki.

¹⁰ Maren espurnia katar e charura ta katar e llene kai si glamne. Asan katar e zidura soke vazden phurda kastune ta den pe lende.

¹¹ Mapalal nakhen sargo iek zurali balav, ta phenen kai lengi zor avel katar lengo del.

¹² Devla, tu san sar kana saia mai anglal o vreme. Na muk amen te mera. Tu Devla san amari pechina, na cher te krisil amen gava foro ta te dukhavel amen. Tu zuriadan e kaldeonen te sai zatrin prema chi joli.

¹³ Tu san but lacho ta nasti dikhe o bilachipe, nasti dikhe kana cheren ezgode kai inai orta. ¿Soke dikhe gole llenen kai mundaren ta ni phene niso kana o bilacho zatril e llene kai si mai lacho neko vou?

¹⁴ ¿Soke chere te aven e llene sargo mache ta sargo sapa kai inai ko te gazdaril pe lende?

¹⁵ Ka ikanen amen saurren e udichaia ta ka chiden amen ande pi mreza, ta kana ka dikhen amen sa chidine ande pi mreza, ka veselinpe, ka pherdon veselia.

¹⁶ Goleke den kurbanura pe mrezenge ta pe udichenge, ta phabaren lenge o taimano, soke pala lende si len barvalipe ta but jape.

¹⁷ ¿Ta isto gia llan te mundaren llenen bi te avel lenge zao lendar?