Isaias 9 - Biblia ande chib Romani

^1a Ta o truniariko ni ka avel ios po dukhado.

Sar ka biandol ta sar ka charoil o Charo katar e pas

^1b A o truniariko ni ka avel sa o vreme golake kai akana si ande nuzda, gia sar avilia poloke e duk e purvo drom ande phuv katar o Zabulon ta katar o Neftali, soke po son ka pherel blagosipe o drom e morako, pe rig katar o Jordan ande Galilea katar gola kai ni pachan ando Del.

² O foro kai llala ando truniariko dikhla o villelo, gola kai zivina ande phuv katar e senka merimaki klichisarda o villelo pe lende.

³ Cherdan te aven mai but llene ta bariardan e veselia. Ka veselinpe angla tu gia sar veselinpe kana chinen o lliu, gia sar si lenge dragostia kana den so achila.

⁴ Soke tu phaglan o baro kas kai saia pe lenge zea, e rran katar lengo dumo ta o gazdaripe katar gua kai dukhavela len sargo ando llive katar o Madian.

⁵ Soke sa e minie e boñikonenge ta suako gertachi makhlo ando rat, ka avel phabardo sargo e char kai phabardol.

⁶ Soke iek minono biandol amenge, chaurro si amenge dino, vou ka charoil ta ka ikhardol Glamno, Gua kai sikavel, O Del o zuralo, O Dad ostade, O Charo katar e pas.

⁷ Leki charoina ta leki pas ka avel but bari po trono katar o David ta pe leki charoina, ka thovel la ta ka chacharel la ande kris ta ando chachipe katar angle ta ostade. O volipe e Devleko ka cherel gaia ezgoda.

E joli e Devleki pe charoina katar o Israel

⁸ Iek orba bichalda o Del kai o Jakob ta peli po Israel.

⁹ Ta ka llanel la sa o foro, o Efrain ta e llene kai zivin ande Samaria, kai istardon ta den orba barikane ta phenen:

¹⁰ E chikle katar e zidura peletar, a ka a amen ka vazda zidura barrustune chinde e kasta sikomoro, amen ka thova te bariol o sedro.

¹¹ A o Del ka cherel te vazdiniaon e dusmanura katar o Resin pe lete ta ka cherel te chidiniaon leke dusmanura,

¹² e siriura ka aven katar likel o kham, a e filisteura ka aven katar perel o kham ta sa ka jan o Israel. A e Devleki joli ni achel ta lenko va si vazdino.

¹³ A o foro ni cherda pe goleko kai dukhavela le ta ni rodia e Devle.

¹⁴ A o Del ka chinel o soro ta e pori katar o Israel, o kas ta e rran ande iek llive.

¹⁵ O phuro ta gole kai den le liubao si o soro, o profeta kai sikavel kojaipe si e pori.

¹⁶ Soke e llene kai gazdarin pe gava foro si kojamne ta gola kai si gazdarime jasaon.

¹⁷ Goleke o Del ni ka veselilpe katar lenge terne, ni katar e bidadenge ta ni ka avel leke katar e phivlia, soke sa si kojamne ta bilache ta suako orba kai den si dilipe. A sa gale ezgodenchar e Devleki joli ni achel ta lenko va si vazdino.

¹⁸ Soke o bilachipe phabili sargo e iag, ta ka phabarel e kasta karrnale ta e karrne ta ka phabol kote kai si mai but kasta ta ka vazdiniaon sargo o thuv kana ulilpe.

¹⁹ Pala e joli katar o Del kai si le sa e zor cherdilo truniariko pe phuv ta e manusa ka aven sargo char te phabardol, ta e manusa ni ka avel lenge zao katar pe phlal.

²⁰ Sa ka zatrinpe maskar pete a niko ni ka chaliol ta ka jan o mas pe vastengo

²¹ O Manases e Efraine ta o Efrain e Manasese ta e dui e Judae. A sa gale ezgodenchar e Devleki joli ni achel ta lenko va si vazdino.