Isaias 8 - Biblia ande chib Romani

Den liubao e Devle

¹ Mapalal o Del phenda mange: Le iek bari chikla ta pisisar pe late letre bare kai phenen katar o Maer, o Salal ta o Jasbaz.

² Ta andem manchar llenen chache te dikhen, avilo manchar o Urias, o Zakarias chavo katar o Jeberekias.

³ Ta sovtem e poraukaia, kai achili phari ta avilala iek minono. Ta o Del phenda: Thou leko anav Maer Salal Jasbaz.

⁴ Soke mai anglal o minono te phenel: Dade ta male, ka avel ikando o barvalipe katar o Damasko ta u llubri katar e Samaria ka anen kai o charo.

⁵ Pale o Del dia manchar orba ta phenda mange:

⁶ Sar ni mangla gava foro o pai katar o Siloe, kai llan poloke, ta sar veselisailo e Rezinea ta e chavea katar o Remalias,

⁷ Goleke akana o Del cherel te vazdiniaon pe lende e bare paia, o charo katar e Asiria kai si but zuralo ta ka avel upral pe sa leke paia ta ka nakhel pe ogoia rig,

⁸ ka nakhel katar o Juda, ta ka pherel le pai llik kai lengi korr ta ka llal angle, ka buliarel pe pakha sargo iek chirikli ta ka pherel sa chi phuv ioi Emanuel.

⁹ Chidiniaon forura ta gola kai si dukhade, asunen sa gola kai zivin dur ande aver phuvia, lacharentumen ta ka aven zatrime lacharentumen ta ka aven phage.

¹⁰ Len bizaipe ta ka avel phago, den orba ta ni ka avel zurali, soke o Del si amenchar.

Katar o Del trubul te dara

¹¹ Soke o Del phenda mange gia zoriaia ta sikada man te na cherav so cherel gava foro ta phenda:

¹² Na phenen kai si kojaipe sa so von phenen kai si kojaipe ta na daran katar so von daran, na daran.

¹³ E Devla kai si le sa e zor, le blagosin, samo letar si te daran ta te den liubao.

¹⁴ Vou ka avel iek santuario, a e duie cherenge katar o Israel ka avel iek bar te eskonban ta ka avel lenge iek solo ta iek mreza e llenenge kai zivin ando Jerusalem.

¹⁵ Ta but llene maskar lende ka eskomban, ka peren ta ka aven zatrime, ka achadon ta ka aven phangle.

O Isaias sikavel pe disipulonen

¹⁶ Phande e orba e chachi, thov o sello po zakono maskar me disipulura.

¹⁷ Ka aduricharav e Devle kai ni dikhla po cher katar o Jakob ta ka uzdiu man ande lete.

¹⁸ Me ta e chaurre kai dia man o Del sam iek bari ezgoda ando Israel e Devletar kai si le sa e zor, kai zivin po burdo katar o Sion.

¹⁹ A te phende tumenge: Puchen golen kai duricharen ta golen kai cheren chirimate, kai den orba poloke, tumen phenen lenge gia: ¿Ni ka del orba o foro pe Devlea? ¿Ka del orba e mulenchar pala e llunde?

²⁰ Te na phende prema o zakono te prema e orba e chachi, si soke ni llivosaila lenge.

²¹ Ta ka nakhen katar e phuv chinie ta bokhale ta kana ka avel lenge bok, ka dikhen upre po miloso ta ka proketin pe charo ta pe Devle.

²² Ka dikhen pe phuv ta ka dikhen burkania, truniariko ta nuzda ta ka aven andre ando truniariko.