Isaias 7 - Biblia ande chib Romani

E purvo poroka katar o Isaias e Ajaseke

¹ Ande llivesa kana o Ajas chavo e Jotameko, ta unuko katar o Usias, saia charo katar o Juda, o Resin charo katar e Siria ta o Pekaj chavo katar o Remalias charo katar o Israel, llele ando Jerusalem te marenpe lenchar ta nasti dobisarde len.

² Ta o David asunda kai e Siria ta o Efrain thodepe zanio. Ta o lio katar o David izdraio ta i o lio katar leko foro izdraio sargo e kasta kai izdrarel len e balav po burdo.

³ Ondaka o Del phenda e Isaiseke: Lla akana tu ta cho chavo o Sear Iasub te malado e Ajasea pe iek rig kote kai chidiniaol o pai upre, po drom katar e phuv goleki kai jalavel,

⁴ ta phen leke: Arak ta achi esmiro, na dara katar o Resin ta e Siria kai phabon jolinatar sargo dui kasta kai likel lendar thuv, ni katar o chavo katar o Remalias.

⁵ Diepe orba te zatrin tut o sirio, o Efrain ta o chavo katar o Remalias ta phenen:

⁶ Aven te mara len ta zatrisara len ta fulava o Juda maskar amende ta thova maskar lende te avel charo o chavo katar o Tabel.

⁷ Goleke o Del o Gazda phenel gia: Ni ka dobin ta ni ka avel gia.

⁸ Soke o soro katar e Siria si o Damasko, ta o soro katar o Damasko si o Resin, ta ande sovardes ta sov burs o Efrain ka avel zatrime ta ni ka avel iek foro.

⁹ Ta o soro katar o Efrain si e Samaria ta o soro katar e Samaria si o chavo katar o Remalias. Tumen te na pachaien, ni ka achen llunde.

E duito poroka: Sar ka biandol o Emanuel

¹⁰ Ta dia orba o Del e Ajasea ta phenda leke:

¹¹ Man te sikavel chuke o Gazda cho Del, isto akana avela chak telal o chak upral.

¹² Ta o Ajas phenda: Ni ka mangav ta ni ka zumavav e Devle.

¹³ Ondaka phenda o Isaias: Asunen tumen kai sen katar o cher e Davideko. ¿Inai tumenge dosta kai chiniaren e llenen, a mangen te chiniaren me Devle?

¹⁴ Goleke isto o Del ka sikavel tumenge: Iek chei ka achel phari ta ka avel la iek minono, ta ka thoven leko anav Emanuel.

¹⁵ Ka jal kaimako ta aullin lligo ni ka esviril vou petar te na jal o bilachipe ta te jal o lachipe.

¹⁶ Soke mai anglal o minono te esviril te na jal o bilachipe ta e jal o lachipe, e phuvia katar dui charura kai dara lendar ka achen puste.

¹⁷ O Del ka cherel te aven pe tute, pe cho foro ta po cher che dadeko, llivesa sar si sea nikada sar kana o Efrain fuladilo katar o Juda te llaltar kai o charo katar e Asiria.

¹⁸ Ande gola llivesa o Del ka ikharel ande sol e makha kai si ando son katar e paia ando Ejipto ta e bindivore kai si ande phuv katar Asiria,

¹⁹ ta ka aven ta sa ka achen ande umalia puste ta maskar e barra phage, ta maskar sa e karrne ta maskar e patra.

²⁰ Ande gua llive o Del ka anel e charo katar e Asiria kai zivil pe ogoia rig katar o pai ta gua charo ka avel sargo iek bursnako chinado, kai ka chinel en bal katar lengo soro ta katar lenge porrne ta i katar lenge chor.

²¹ Ande gola llivesa iek manus ka bariarel iekhe guruve ta duie bakren,

²² ta sar ka den le gachin thud, gola kai ka zivil po maskaral katar e phuv ka jal kaimako ta aullin.

²³ Ta i ka avelpe ande gola llivesa, kai te avela iek umal kai saia la milia kasta drakhenge kai mola len milia tolaria rupune, ka cherdon karrne ta char suki.

²⁴ Ka llan incha ta ka inllaren pea arkura ta llide soke sa e phuv ka avel kasta karrnale ta karrne.

²⁵ Ta niko ni ka llal te radil e phuv pasa e burdura soke ka daran katar e karrne ta katar e kasta karrnale, ta ka achen e guruvenge te jan ta te ustaven len e bakre.