Isaias 61 - Biblia ande chib Romani

Phendol o braduipe e Israeleke

¹ O duo e Devleko si upral pe mande, soke esvirisarda man o Del, bichalda man te phenav e lachi viasta e dukhadenge, te uliu e duk katar e lie dukhade te phenav e katar o mukliardipe e phanglenge, ta te phenav golenge kai si ando phandipe kai ka aven mukliarde,

² te phenav katar o lacho burs e Devleko ta o llive kai o Del ikanda pi joli ta dia zor sa golen kai si ande zalba,

³ te phenel te den liubao e llenen katar o Sion kai si dukhade a na te muken len ando prajo, te den len blagosipe a na zalosno, te aven ucharde katar e veselia, a na te avel lengo duo tristome, ta ka thoven lengo anav kasta chachimake thode te barion e Devletar ta te blagosin le.

⁴ Ka vazden e zidura purane kai sea phage ta ka thoven pe porrne o purvo phagipe, ta ka lacharen e forura phage, o phagipe katar but porodura.

⁵ E llene katar aver phuvia ka arakhen tumare bakren ta e llene avere phuvienge ka arakhen tumari phuv ta tumare drakha.

⁶ Ta tumen ka aven ikharde popura e Devleke bichalde ka aven ikharde bichalde katar amaro Del, ka jan katar o barvalipe e phuviengo, a pala lengo blagosipe tumen ka aven glamne.

⁷ Pala e dui droma kai sena ando lallao ka blagosin tumen ande tumari phuv, goleke tumari phuv ka avel blagosime dui droma, ta tumari veselia ka avel ostade.

⁸ Soke me o Del, voliu o chachipe ta murziu po choripe ta po kojaipe, goleke ka dav len zor ando chachipe pe so cheren, ta ka achav lenchar pe iek alav ostade.

⁹ Ta lengo porodo ka avel pinllardo maskar e phuvia, ta lenge chaurre ka aven pinllarde maskar forura, kogo ka dikhel len, ka llanen kai si vicha blagosime e Devletar.

¹⁰ But zurale ka veseliu man ando Del mo lio ka veselilpe ando Del, soke furiada man ande patave braduimake, thoda pe mande iek gertachi chachimako lacharda man sargo iekhe terne kai zinilpe ta sargo bori lachardi kai si pe late o sunakai.

¹¹ Soke gia sar likel katar e phuv o purvo zelenipe, ta gia sar ando vostano barion e simiche, isto gia o Del ka cherel te likel o chachipe ta o blagosipe angla sa e phuvia.