Isaias 6 - Biblia ande chib Romani

Sar avilo ikhardo o Isaias

¹ Ando burs kai mulo o charo Usias me dikhlem e Devle kai besela chak upre pe iek trono blagosime, ta leko fistano pherela o cher e Devleko.

² Upral katar saia vou sea dui serafine kai achena pe porrne, suako iek saia le sov pakha, duienchar ucharena po mui, duienchar pe porrne ta ogole duienchar furiana.

³ Ta iek lendar urkila pe ogola ta phenela: Santo, santo, santo, o Del kai si le sa e zor, sa e phuv si pherdi katar leki zor.

⁴ Ta e udara katar o cher e Devleko dermosaile kana asundilo o avazi katar gua kai urkila ta o cher pherdilo thuv.

⁵ Ondaka phendem: ¡Tesko mange, akana ka merav soke me us si pokalime ta soke ziviu maskar e llene kai lenge us si pokalime! Dikhlem e Charo, o Del kai si le sa e zor.

⁶ Ta furiao mande iek katar e serafine, ta ande leko va saia iek angar phabardo kai ikanda katar o altar iekhe kliastoia,

⁷ dodisarda lea me us ta phenda: Akana gaia ezgoda dodisarda che us ta chi dos si ikandi tutar ta i cho bilachipe achel chisto.

⁸ Ondaka asundem o avazi e Devleko kai phenela: ¿Save llene ka bichalav? ¿Ko ka avel amaro bichaldo? Ondaka phendem me: Kate sem, bichal man.

⁹ Ta vou phenda: Lla ta phen gale foroke: Asunen ta na acharen, dikhen ta na razumin.

¹⁰ Na muk te acharel gava foro, phande lenge kan ta korrav lenge akha, te na dikhen pe akhenchar ta te na asunen pe kanenchar ta lengo lio te na acharel ta te na pharudol ta te na sastol.

¹¹ Ta me phendem: Devla ¿Llik kai? Ta vou phenda: Lligo ni ka aven puste e phuvia ta ni ka zivil niko ande lende ta kana ni ka avel llene ande chera ta kana e phuv ka achel pusti,

¹² lligo ni ka chudel o Del e manusen dur ta kana ka cherel te aven mai but thana puste pe phuv.

¹³ A te achena des katar e stotina, pale ka avel zatrime, a gia sar o roble ta e ensina kai kana chinen len achel lengo kas ande phuv, sargo gua ka avel e vicha santa.