Isaias 57 - Biblia ande chib Romani

¹ O chacho merel ta niko ni thovel sama, e llene lache meren ta niko ni acharel kai von meren pala o bilachipe kai si.

² Von ka aven ande pas, ka achen ande po than sa gola kai llan angla o Del.

Inai sukar te blagosin avere delen

³ A tumen aven kate, chave katar e chirimatarka, vicha katar o kurvaluko ta katar e kurvichka:

⁴ ¿Katar marden espurnia? ¿Pe ka putarden tumaro mui ta bariarden tumari chib? ¿Ni sen tumen e chave kai ni kanden ta vicha kojamni,

⁵ kai telal katar e bare kasta phabon tumare lie tumare delenchar, kai den kurbano e chaurren ande umalia, maskar e pechine?

⁶ Ande barra orta katar e umal si cho than, von si chi baj, ta andan lenge ezgode dine ta cherdan lenge kurbano moliako. ¿Ta mangen te veseliu man pala gala ezgode?

⁷ Upral po baro burdo ta vazdino thodan cho kerveto, ta kote likistan te chere kurbano.

⁸ Ta pala o udar muklan che alav, soke ikandan tutar che patave, likistan upre bi murno kai cho than ta buliardan le, achilan pe iek alav, volisardan lengo kerveto kaigo dikhea le.

⁹ Ta llelan kai o charo zeitinoia, pherdan tut meriso ta bichaldan dur e llenen kai dena orba cheres tu, ta pelan chak tele ando limori.

¹⁰ Chinilan kai phirdan pe but droma, a ni phendan: Llik kate avilem, maladan nevi zor ande cho va ta goleke ni jasardan e vlaga.

¹¹ ¿A katar darailan, ta avila chuke dar kai jasardan cho pachape, ta ni dian tut golli mandar? ¿Ni cheren but burs kai ni phene niso ta nikada ni darailan mandar?

¹² Me ka phenav cho chachipe ta so chere, ta ni ka mol chuke niko.

¹³ Kana ka mangen te braduin tut che dela, a saurren ka inllarel e balav, iek balaviorri ka inllarel len, a kogo uzdilape ande mande e phuv ka achel leke, ta leko ka avel mo santo burdo.

E duk ta o sastipe katar o Israel

¹⁴ Ta ka phenel: Ortosaren, metisaren o drom, len e ezgode katar o drom te na eskombal mo foro.

¹⁵ Soke o Baro ta Glamno, gua kai zivil ande chara ta leko anav si Santo phenda gia: Me ziviu upre kote kai si santo, ta e llenenchar kai si dukhade ta si prosto lengo duo, te dav zivoto e duo katar e llene proste ta cherav te zivil o lio katar e llene dukhade.

¹⁶ Soke ni ka marav man ostade ta ni ka avav joliariko sa o vreme, soke ka chiniol mo duo ta e zivotura kai cherdem.

¹⁷ Me jolailem me foroia soke bilachimaia mangena te cheren pe piro, ta dukhadem len, jolailem ta ni sikadilem lenge, ta isto gia ni kandena ta cherena so von mangen.

¹⁸ Dikhlem so cherde, a ka sastarav len ta ka inllarav len sargo iak chobano, ta ka dav le zor ta i leke llenen kai si zalosno,

¹⁹ ta ka cherav te phenen lenge us: Pas, pas goleke kai si dur ta goleke kai si pase phenda o Del, ta ka sastarav len.

²⁰ A e llene kai ni pachan si sargo e mora divi, kai nasti ache pe po than, ta lako pai chudel petar e mel ta o glibo.

²¹ O Del phenda inai pas, e llenenge kai ni pachan.