Isaias 54 - Biblia ande chib Romani

E Devleko volipe inai le son

¹ Veselisao tu kai nasti bianea, tu kai nasti avena tut minone, llilabe ta urkisar veselimatar tu kai nikada ni sana po khamnipe, soke mai but si e minone katar goia kai achili korkorre, neko katar goia kai si la rrom, gia phenda o Del.

² Buliar chi chara ta e chitura katar che sobe, na estedi bariar che chilodoria, ta mar che chile.

³ Soke ka bulio pe rig e chachi ta i pe rig stingo, ta cho porodoke ka achen e phuvia, ta ka zivin ande phuvia zatrime.

⁴ Na dara, soke ka llene so te chere, na lalla, soke ni ka kusen tut. Ka bristare tut katar o lallao kai nakhlan ande cho ternipe, ta katar o lallao katar cho phivlipe ni ka de tut golli ios.

⁵ Soke cho rrom si gua kai cherda tut, o Del kai si le sa e zor gia si leko anav, ta cho Braduimari, o Santo katar o Israel, Del katar sa e phuv kai ikharen le.

⁶ Soke o Del ikharda tut sargo iekhe diskinia kai mukle le ta kai si tristome lako lio, ta sargo iek rromi kai muken la, cho Del phenda:

⁷ Cherricha vreme ka mukav tut, ta ka avel manga bari zalba tutar ta ka lav tut.

⁸ Me sema cherricha joliariko ta gurudem mo mui tutar, a ostade ka avel mange zalba tutar, gia phenda o Del cho Braduimari.

⁹ Soke mange ka avel sargo ande llivesa katar o Noe, kana diem mo alav kai nikada ios ni ka nakhel o pai pe phuv isto gia diam mo alav kai ni ka joliaivav pe tute ta ni ka thovav chuke kasti.

¹⁰ Soke e burdura ka miskonpe, ta e burdichura ka izdran, a tutar ni ka duriol mi zalba, ta ni mo alav katar mi pas ni ka phagav, gia phenda o Del, gua kai si leke zalba tutar.

E nevi Jerusalem

¹¹ Iani, chiñi katar o bursin, inai ko te del la zor me ka thovav che zidura upral pe barra lole ta pe safirura.

¹² Che penllerave ka cherav len katar e barra kuch, che udara katar e barra lole, ta sa che zidura katar e barra kuch.

¹³ Ta sa che chaurren ka sikavel len o Del ta ka bariol e pas katar che chaurre.

¹⁴ O chachipe ka dikhol sukar pe tute, ni ka dara ios te gazdarin pe tute ta e dar ka llaltar tutar ta nikada ios ni ka avel pasa tute.

¹⁵ Ko mangela te marelpe tuia, me ni ka avav lea, ko ka mangel te marelpe tuia, ka perel angla tute.

¹⁶ Me cherdem e llene kai radil ando o sastri, ka phurdel pe iag ta ikanel po alato te radil, ta me cherdem gole kai zatril, te zatril.

¹⁷ Ni iek ezgoda cherdi te marelpe manchar ni ka llal lake sukar, ta kogo dela orba bilachi tutar pe kris ka dosare le. Gava si so mukla e slugenge katar o Del, ta lengo braduipe ka avel mandar, gia phenda le o Del.