Isaias 53 - Biblia ande chib Romani

¹ ¿Ko pachaia so phendam? ¿ta pe ka sikadilo o va e Devleko?

² Ka likel sargo iek lulunllin zeleni angla le, ta sargo iek zila katar e phuv suki, inai sar te dikhe pe lete, inai sukar, ka dikha le bi te avel sukaripe ande lete te avel amenge drago.

³ Ka murzin pe lete ta ka avel tradino maskar e manusa, llanglo ande duk, ta sargo kana gurudilam letar, ni saia volime, ta ni thodam leke sama.

⁴ Chachimaia vou inllarda amaro nasualipe, nakhla amari duk, a amen dikhlam le sargo iek lleno kai chalaven le, kai o Del dukhada le ta perada le.

⁵ A vou avilo dukhado soke ni kandiam, zatrime pala amaro bilachipe, dukhado te sai avel amen pas, ta pala leke rane avilam amen sastarde.

⁶ Sa amen likistam katar o drom sargo bakre, suako iek llelo pe piro drom, a o Del thoda pe lete e dos saurrengi.

⁷ Ande nuzda ta e briga, ni phenda niso, sargo iek bakro inllarde le te mundaren le, ta sargo o bakro kana chinen leke bal, ni phenda niso ta ni putarda po mui.

⁸ Nakhlo pe rubie ta pe kris ta mundarde le, a leki vicha ¿ko ka llinel la? Soke ikande le katar o sueto kai zivil, ta avilo dukhado pala o bilachipe me foroko.

⁹ Thode leko limori maskar e bilache, ta leko meripe saia e barvalenchar, a nikada ni cherda o bilachipe, ta ni phenda o kojaipe katar po mui.

¹⁰ A o Del mangla te dukhavel le, ta cherda le te nakhel pe nuzda. Kana ka del pe kurbano pala o bilachipe, ka dikhel porodo, ka zivil but burs, ta o Del ka avel bariardi ande leko va.

¹¹ Ka dikhel o lachipe pala duk kai nakhla, ta ka avel veselo, pala e ezgode kai llanel ka llinel chache bute llenen mo sluga o chacho ta ka inllarel lengo bilachipe.

¹² Goleke me ka dav le iek than e barenchar, ta e zuralenchar ka fulavel so dobisarda, soke chordilo leko zivoto llik kai o meripe, ta avilo llindo e bilachenchar, a inllarda o bilachipe bute llenengo ta molisailo pala gola kai ni kanden.