Isaias 52 - Biblia ande chib Romani

O Jerusalem si te avel mukliardo

¹ Llungado, llungado, Sion, furiado ande zor, thov che sukar patave, ioi Jerusalem, foro santo soke nikada ios ni ka avel tute llene kai ni cherde e sirkunsision ta kai si manusa pokalime.

² Chinosao katar o prajo, uste ta bes, Jerusalem, putar chi kor katar o phandipe phanglie chei katar o Sion.

³ Soke gia phenel o Del: pala niso avilen bichinde, goleke bilovenchar ka aven braduime.

⁴ Soke gia phenda o Del o Gazda: Mo foro fulisto ando Ejipto omanglal, te zivin kote, ta o asirio phangla le pala niso.

⁵ A akana ¿so cherav kate phenel o Del, a me foro inllaren le pala niso? ta gola kai gazdarin pe lete cheren le te auchilpe, phenel o Del ta kusen mo anav sorro llive.

⁶ Goleke, ka llanen mo anav pala gaia ezgoda, soke isto me kai dav orba, ka avav kote.

⁷ ¡Gia sukar si e porrne upral pe burdura katar o lleno kai anel viaste vesele, gua kai phenel katar e pas, gua kai aven viaste lache, gua kai phenel katar o braduipe, gua kai phenel e Sioneke: Cho Del charoil!

⁸ ¡Avazi katar che llene kai prezon! Ka vazden po avazi ta ka urkin veselimatar, soke ka dikhen pe akhenchar kai o Del pale irilpe ando Sion.

⁹ Llilaben llilia kai blagosin, veselintumen, soke o Del dia zor pe foro, o Jerusalem avilo braduime letar.

¹⁰ O Del pucharda po va angla sa e phuvia, ta suako rig e phuviengi ka dikhel o braduipe katar amaro Del.

¹¹ Durion, durion, ¡na dodin e ezgode pokalime! liken latar, chiston tumen gola kai inllaren e ezgode e Devleke.

¹² Soke ni ka liken sigarde, ta ni ka nasen, soke o Del ka llal angla tumende, ta ka chidel tumen o Del katar o Israel.

Sar ka dukhadol ta sar ka dobil o sluga e Devleko

¹³ Mo sluga ka dobil but, ka avel bariardo ta blagosime, ta ka avel thodo but upre.

¹⁴ But llene chudisaile tutar, ni pinllardola maskar e manusa gia sar saia, leko sukaripe ni saia sargo sa e manusengo,

¹⁵ gia ka cherel te chudenpe letar but phuvia, ka phanden po mui angla le, soke ka dikhen so nikada ni phende lenge, ta ka acharen so nikada ni asunde.