Isaias 51 - Biblia ande chib Romani

Alava kai len e duk katar o Jerusalem

¹ Asunen man, gola kai llan pala o chachipe gola kai rodel e Devle. Dikhen po barr katar avilen chinde, ta po putardipe barrustuno kai anade te ikanen tumen.

² Dikhen po Abraam tumaro Dad, ta pe Sara kai bianda tumen, soke kana saia samo iek, ikhardem le, ta blagosisardem le ta cherdem te avel le but porodo.

³ Chachimaia o Del ka del zor e Sione, ka del le zor kai achilo korkorre, ta ka pharruvel leko pusto ando sukaripe, ta kote kai ni saia niso ka bariol o vostano e Devleko, kote ka avel veselia ta dragostia, blagosipe ta llilabipe veselo.

⁴ Thoven sama pe mande, foro murno, asun man murni phuv, soke mandar ka likel o zakono ta mo chachipe e phuvienge.

⁵ Pase si mo chachipe, likisto mo braduipe, ta me va ka krisin e phuvien, man aduricharen gola kai zivin pasa e mora ta von uzdinpe ande po va.

⁶ Dikhen upre po miloso ta tele pe phuv, soke o miloso ka avel biladino sargo o thuv, ta e phuv ka phuriol sargo e patave kai phirava, ta isto gia ka meren gola kai zivin kote, a mo braduipe ka avel ostade ta mo chachipe ni ka merel nikada.

⁷ Asunen man gola kai pinllaren o chachipe, foro ka ande tumaro lio si mo zakono. Na daran kai kusen tumen e manusa ta na jasaren e vlaga pala lengi joli,

⁸ Soke sargo e patave kai jal len o chermo isto gia ka jal len, sargo e bal e bakreke isto gia ka jan len e cherme, a mo chachipe ka achel ostade, ta mo braduipe sa e bursenchar.

⁹ Llungado, llungado, furiado katar e zor va e Devleko, llungado sargo omanglal sargo ande bursa e purane. ¿Ni san tu gua kai chinda po dopas e Rabae, ta kai nakhada po dopas e iagartane?

¹⁰ ¿Ni san tu gua ka sukarda e mora, o pai katar e bari jar, gua kai cherda e bari mora te cherdol drom te nakhen e llene braduime?

¹¹ Chachimaia ka irinpe kai o Del e braduime, ka irinpe ando Sion llilabindo, ta upral pe lende ka avel e veselia ostade, ta dragostia, ka aven vesele ta o roipe ta e duk ka nasen.

¹² Me, me sem kai dav tumen zor. ¿Ko san tu te dara e katar o manus, kai merel, ta katar iek chaurro manus kai si sargo char suki?

¹³ Bristrailan katar o Del ka cherda tut, kai buliarda o miloso ta cherda e phuv, ta suako llive daraia katar e joli goleki kai dukhavel, kana thovelape te zatril. ¿A kaitali e joli katar gua kai zatril?

¹⁴ O phanglo chinio ka avel mukliardo oma, ni ka merel ande rubie, ta ni ka achel bi mrneko.

¹⁵ Soke me o Del, kai miskou e mora ta cherav te basen e valura, sem cho Gazda, kai leko anav si o Del kai si le sa e zor.

¹⁶ Ta ande chiro mui thodem me alava, ta uchardem tut e senkaia katar mo va, buliardem o miloso ta thodem e barra kai istaren e phuv, ta phendem e Sioneke: Tu sam mo foro.

¹⁷ Llungado, llungado, uste Jerusalem, kai pilan katar o va e Devleko o taso katar e joli e Devleki, sa pilan so saia ando taso katar o zalipe.

¹⁸ Katar sa e chaurre kai avila la, inai ko te inllarel la angle, inai ni iek chaurro te istarel la e vastetar.

¹⁹ Gala dui ezgode avile chuke: Silnope ta zatrania. ¿Ko ka dukhadol pal tu? ¿Ko ka del tut zor?

²⁰ Che chaurre jasarde e zor, achile inzarde kote kai maladon sa e droma, sargo e antilope istarde ande mreza ta pe lende sa o pharipe katar e joli e Devleki.

²¹ Goleke asun gaia ezgoda, matie, a ni pilan mol.

²² Gia phenda o Del cho Gazda, kai si cho Del, kai dia orba pala po foro: Liem katar cho va o taso kai zalil ta nikada ios ni ka pie letar.

²³ Ta ka thovav le ando va katar gola kai dukhaven tut, gola kai phenena chuke: bangiu ta ka nakha upral pe tute. Ta tu thodan chi esnaga sargo phuv, ta sargo drom te sai nakhen.