Isaias 47 - Biblia ande chib Romani

E Babilonia jasarel

¹ Fulie ta bes po prajo, chei chorrie katar e Babilonia, bes pe phuv, inai tut trono chorri katar e Kaldeura soke nikada ios ni ka phenen chuke kai san gugli ta sukar.

² Le chuke o lliu ta mor le, chude o dikhlo kai si pe cha bal, vazde cho fistano, puchar che porrne ta nak katar e paia.

³ Cho nangipe ka achel puchardo ta ka dikhol cho lallao, ka pochinav chuke ta ni iek lleno ni ka kurtulilpe.

⁴ Amaro Braduimari o Del kai si le sa e zor gua si leko avav, o Santo katar o Israel.

⁵ Bes, achi, te de ando truniariko, chei katar e kaldeura, soke nikada ios ni ka ikharen tut rromi katar e phuvia.

⁶ Jolailem pe mo foro, murisardem golen kai si murne ta diem len ande che va, a chuke ni avila zalba, pe phure muklan te perel cho pharipe.

⁷ Tu phenea: Ostade ka avav e rromi. A ni mislisailan ande gaia ezgoda, ta ni dian tut golli katar cho son.

⁸ Akana asun gaia ezgoda, tu kai chere sogo mange, tu kai bese ta si tut vera, tu kai phene andre ande chi lio: Me sem ta avri mandar inai ios, ni ka achav phivli, ta ni ka llanav so si te na aven man minone.

⁹ Gala dui ezgode ka aven chuke isto ande iek llive, ka ache phivli ta ni ka aven tut minone, gala ezgode ka peren pe tute zurale makar cherea bare chirimate.

¹⁰ Soke uzdisailan ande cho bilachipe ta phendan: Niko ni dikhel man. Cho bizaipe ta isto chiro llanglipe kojade tut, ta phendan ande cho lio: Me ta niko ios.

¹¹ Goleke ka avel pe tute o bilachipe, kai ni ka llane sar te achave le, ka perel pe tute e nuzda ta ni ka llane sar te achave la, ta zatrania kai ni pinllare ka avel pe tute kana ni ka uzdi tut.

¹² Achi ande che chirimate, ta ande cho bari drabaripe, kai thodan sa chi zor sar kana sana terni, sai avelpe kai ka sasto, o sai ka le zor.

¹³ Chinilan kai gachin orbe dian. Te aven akana che orbe te pomozin tut te aven te pomozin tut akana gola kai dikhen po miloso, gola kai dikhen pe cheraia, gola kai llinen e chona te phenen so ka avelpe tutar.

¹⁴ Von ka aven sargo prajo, e iag ka phabarel len nasti ka nasalen po zivoto katar o plameko, gola ni ka aven angara te taton lenchar ta ni iek iag te besen truial.

¹⁵ Gia ka aven tuia gola kai chinilan lenchar, gola kai phirde tuia sar kana sana terni, suako iek ka llaltar pe po drom ta ni ka avel ko te braduil tut.