Isaias 43 - Biblia ande chib Romani

O Del si o edino Braduimari

¹ Akana gia phenel o Del kai cherda tut, Jakob, foro katar o Israel: Na dara, soke me braduisardem tut, me thodem chuke iek anav, tu san murno.

² Kana ka nakhe katar e paia, me ka avav tuia, a te nakhea katar e len ni ka tasavel tut. Kana ka nakhe katar e iag, ni ka phabarel tut, ni o plameko ni ka phabol pe tute.

³ Soke me o Gazda, cho Del, o Santo katar o Israel, me sem cho braduimari, diem e Ejipto te braduiv tut, diem e Etiopia ta o Seba pala tute,

⁴ Soke mange mol tut but, avila tut liubao ta volisardem tut, goleke ka dav pala tute manusen, ka dav phuvien te sai zivi tu.

⁵ Na dara, soke me sem tuia, katar likel o kham ka anav che porodo ta katar perel o kham ka chidav tut.

⁶ Ka phenav karing o norte: De len kate, ta karing o sur ka phenav: Te na achave len, ka anav duratar me chaven ta me cheen katar suako rig e phuviaki,

⁷ sa gola si len mo anav gola kai cherdem len te blagosin man.

⁸ Ikanen e foro kai si le akha ta ni dikhel, ta e kasuken kai si len kan.

⁹ Chidiniaon sa e phuvia ande iek than, chidiniaon sa e forura. ¿Ko lendar sai anel amenge iek nevi viasta katar gaia ezgoda, ta ko sai cherel te asuna e purve ezgode? Anen tumare llenen te den iek orba chachi, ta chacharen tumen, asunen ta phenen: Chachipe si.

¹⁰ O Del phenel gia: tumen sen me llene kai den e orba chachi, ta mo sluga kai me esvirisardem, ta sai pinllaren man ta te pachan, ta te acharen kai isto me sem, mai anglal mandar ni saia cherdo ni iek del ta ni ka avel mapalal mandar.

¹¹ Me, me o Del, ta inai aver kai sai braduil.

¹² Me phendem le ta braduisardem ta cherdem te llanenle, ta ni saia maskar tumende averengo del. Gia phenel le o Gazda: Tumen sen me llene kai den e orba chachi, kai me sem o Del.

¹³ Mai anglal te avel o llive, me sema niko nasti kurtulilpe katar mo va. Ta niko nasti achavel so me cherav.

¹⁴ Gia phenel o Del, tumaro braduimari, o Santo katar o Israel: Bichaldem llenen te marenpe ande Babilonia te sai braduin tumen ta cherdem te nasen sa, llik e kaldeura nasle ande llimie kai cherena baripe ande lende.

¹⁵ Me o Del, o Santo tumaro, kai cherda o Israel, tumaro Charo.

¹⁶ Gia phenel o Del, gua kai putarel drom gua kai putarel drom pe mora, ta drom po paia e divome,

¹⁷ gua kai ikanel bordon ta gra, boñiko ta zor, eli dui peren ta ni usten ios, sargo iek memeli achen mundarde.

¹⁸ Na den tumen golli katar e ezgode ka nakhle ta na mislin tumare ande ezgode purane.

¹⁹ Me cherav iek nevipe, but oma ka llangliolpe, ¿ni llanen so si? Pale ka putarav drom po pusto, ta paia kote kai ni saia niso.

²⁰ E zivirinie dive katar o vos ka blagosin man ta i e llukela dive ta avestruse minone, soke ka dav len pai po pusto, paia kote kai ni saia niso te sai piel mo foro, mo esvirime.

²¹ Gale foro cherdem le mange, gava foro ka phenen mo blagosipe.

²² Ta ni manglan mandar, Jakob, tu chinilan mandar, Israel.

²³ Ni andan mange kurbano bakrengo ta ni blagosisardan man che kurbanonenchar, ni cherdem tut te ane ezgode dine ta ni chiniardem tut e taimanoia.

²⁴ Ni chindan mange lovenchar kas kai khandel sukar ta ni dian man o thulo mas katar o kurbano te chalivav, a tu thodan pe me zea o pharipe katar cho bilachipe, chiniardan man che bilacimaia.

²⁵ Me, me sem gua kai kosel cho bilachipe, pala o volipe isto pe mande, ta ni ka dav man golli katar cho bilachipe.

²⁶ Cher te dav man golli, aide e dui pe kris, de orba tu te chachare tut.

²⁷ O purvo katar che papura cherde o bilachipe, ta gola kai sikade tut cherde le.

²⁸ Goleke ni avila man liubao e llenenchar kai sea gazda pe chara e Devleki, ta o Jakob achilo proketo ta o Israel ando lallao.