Isaias 42 - Biblia ande chib Romani

O sluga e Devleko

¹ Etalo mo sluga, me dav le zor, ta mo duo veselilpe pala le, upral pe lete thodem mo duo, vou ka anel o chachipe kai e phuvia

² Ni ka urkil ta ni ka vazdel po avazi ta ni ka asundol leko avazi pe drom.

³ Ni ka phagel o kastorro kai si chaladino, ta ni ka mundarel e memeli kai thuvarel, pala so si orta ka anel o chachipe.

⁴ Ni ka chiniol ta ni ka jasarel e vlaga lligo ni ka thovel pe phuv o chachipe, ta e forura kai si pasa e mora ka aduricharen leki kris.

⁵ Gua phenel o Del o Gazda, kai cherda o miloso, gua kai buliarel le, gua kai buliarel e phuv ta e ezgode kai del, gua kai del zivoto e llenen kai zivin pe phuv ta kai del o duo golen kai phiren pe late:

⁶ Me o Del ikhardem tut ando chachipe, ta ka istarav tut e vastetar, ka arakhav tut ta tu ka ave o alav kai ka dav e foro ta villelo e phuvienge,

⁷ te putare e akha e correnge, te ikane katar o rubie e phanglen, ta katar o phandipe golen kai zivin ando truniariko.

⁸ Me o Del, gava si mo anav, ta avere ni ka dav mo liubao, ta ni mo blagosipe e sliken.

⁹ E purve ezgode cherdile, ta me phenav neve ezgode, mai anglal te dikhon me ka sikavav len tumenge.

Llili blagosimaki soke o Del braduil

¹⁰ Llilaben e Devleke iek llili nevi, te asundol pe suako rig kai blagosin le, gola kai fulien ande mora ta sa so si andre, e ezgode kai zivin andre ta sogo si andre.

¹¹ Te urkil o pusto ta leke forura, e forichura kai zivil o Kedar, te llilaben e llene katar e Petra, urkisaren upral pe burdura.

¹² Blagosin e Devle, ta phenen katar leko blagosipe pasa e mora.

¹³ O Del ka likel sargo iek lleno tromano, sargo iek lleno kai llal po maripe ka joliavel, vazdel po avazi ta urkil sikavel po tromanipe pe dusmanonenge.

¹⁴ But vreme ni diem orba, ni phendem niso, ta achilem, Ka urkiu sargo e diskinia kai maladol kake.

¹⁵ Ka mukav puste e burdura ka sukarav sa e char katar e burdura, ka cherav te chidiniaon pe iek than lenge paia, ta ka sukarav o pai kai likel katar e phuv.

¹⁶ Ka inllarav e korre katar iek drom kai ni pinllarena, katar e dromorra kai ni llanena ka thovav len te phiren. Angla lende ka pharuvav o truniariko ando villelo ta ka ortou o bangipe. Gala ezgode ka chereu lenge ta ni ka mukav len korkorre.

¹⁷ A golen kai pachan ande slike ka chereu te na acharen, gola kai phenen gia e sastrune slikenge: Tumen sen amare Deva.

O Israel ni dikhel

¹⁸ Kasukalen, asunen, korralen, acharen ta dikhen.

¹⁹ Niko inai gia korro ta kasuko sargo mo sluga, gua kai bichaldem le, ta niko inai gia korro ta kasuko sargo mo bichaldo, o sluga e Devleko,

²⁰ kai dikhel but ezgode ta ni acharel, kai putarel pe kan ta ni asunel.

²¹ O Del pala o volipe ka si le pe po chachipe mangla te blagosil ta te bariarel o zakono.

²² A gale foro kai chorde le, ta ustade le, ta sa achile phangle andre ande burdura ta gurudine ande rubie, sa lie lendar, ta inai ko te braduil len, inai len niso ta inai ko te phenel: irin len pe lengo than.

²³ ¿Ko tumendar ka asunel gaia ezgoda? ¿Ko ka thovel sama te asunel so ka avelpe?

²⁴ ¿Ko e Jakobo sargo kana vou saia iek ezgoda chordani ta ko dia e Israele kai e chorane? ¿Ni cherdam amen o bilachipe e Devleke? Nikamle te llan pe leke droma ta ni asunde leko zakono.

²⁵ Goleke, cherda te perel pe lete pi joli ta pi zor marimaki, thoda truial letar e iag ta ni acharda, ta phabarda le, a ni thoda sama.