Isaias 41 - Biblia ande chib Romani

O Del del po alav kai ka mukliarel e Israele

¹ Asunen man, tumen kai sen pasa e mora ta len zor e forura, aven pase ta den orba da amen orba saurre pe kris.

² ¿Ko llungada katar likel o kham gole chache? ¿Ko mangla letar te llal pala le? ¿Ko dia le e phuvia ta cherda le gazda pe charura? ¿Ko mukla len sargo prajo pe jarniea? ¿Ko ikanda len pe arkoia, sargo char suki?

³ Llelo pala lende bidarako katar e droma kai nikada ni nakhlea.

⁴ ¿Ko cherda gaia ezgoda? ¿Ko ikharel e porodo sar kana saia mai anglal? Me o Del, kai sema ta kai ka avav ostade.

⁵ E phuvia pe mora dikhle ta daralie, e phuvia kai si mai dur izdraie daratar, chidinaile ta avile.

⁶ Suako iek pomozisarda gole kai zivila pase, ta phenda pe phlaleke: De tut zor.

⁷ Gua kai cherela ezgode kastune dela zor gole kai chere ezgode rupune, gua kai ortola e chokanoia gole kai marela po dopo, ta phenena: Lachi si e kolis, ta kafrosarda te na miskolpe.

⁸ A tu Israel, san mo sluga, tu Jakob, tut esvirisardem, porodo katar o Abraam mo amal.

⁹ Soke liem tut katar si e phuvia mai dur, katar e phuvia kai si but dur ikhardem tut, ta phendem chuke: Tu san mo sluga, esvirisardem tut ta ni chudiem tut.

¹⁰ Na dara soke me sem tuia, na jasar e zor, soke me sem cho Del ka dav tut zor, suako drom ka pomoziu tut me vastea o chacho katar o chachipe.

¹¹ Sa gola kai joliaon pe tute ka achen ando lallao ta ni ka llanen so ka cheren, ka aven sargo niso ta ka meren gola kai marenpe tuia.

¹² Ka rode golen kai marenpe tuia, ta ni ka malave len, ka aven sargo niso, gola kai roden te aven ando maripe tuia, ka aven sargo iek ezgoda kai inai.

¹³ Soke me o Gazda sem cho Del, kai istarel tut katar cho va o chacho, ta phenel chuke: Na dara me pomoziu tut.

¹⁴ Na dara chermo katar o Jakob, tumen kai sen cherricha katar o Israel, me ka pomoziu tumen, o Del phenenle, o Santo katar o Israel si cho braduimari.

¹⁵ Me cherdem te ave sargo iek trillo, iek trillo nevo, pherdo danda ta lea ka ka nakhe lea pe burdura ta ka drobo len, ta e burdura ka achen sargo prajo.

¹⁶ Ka chude len upre ta ka inllarel len e balav, ta ka rispil len e balav, a tu ka veseli tut ando Del, ka chere baripe ando Santo katar o Israel.

¹⁷ E chorre ta e dukhade roden e paia, ta ni malaven len, lengi chib sukili trusatar, Me o Del ka asunav len, me o Del katar o Israel ni ka mukav len korkorre.

¹⁸ Chak upral ka putarav e paia, ta katar e umalia ka likel o pai, po pusto ka chidiniaol o pai, ta ka jutel o pai katar e phuv suki.

¹⁹ Ka cherav te barion po pusto iek katar suako kas.

²⁰ Te sai dikhen ta te pinllaren, te prezon ta te acharen sa e llene, kai o va e Devleko cherel gala ezgode ta kai o Santo katar o Israel cherda le.

O Del chikil e delen kojamnen

²¹ Marentumen pala tumaro chachipe, phenel o Del, chacharen tumen, phenel o Charo katar o Jakob.

²² Aven, phena amenge so si te avelpe, phenen amenge so avilape chak omanglal, ta ka misli amen ande goia ezgoda, o sikaven amenge so ka avel mai angle te sai llana le.

²³ Sikaven amenge sar ka avelpe mapalal, ta sai llana kai tumen sen dela, te llana kai cheren o lachipe, o o bilachipe, te sai avel amen so te phena, ta te chudiamen.

²⁴ Tumen ni sen niso ta e ezgode kai cheren ni mol len niso, pherdo bilachipe si gua kai esvirisarda tumen.

²⁵ Vazdiam iekhe katar o norte, ta ka avel, ka molilpe mange katar likel o kham, ta ka ustavel e gazden tala pe porrne sargo glibo kai ustavel gua kai radil e chik.

²⁶ ¿Ko phenda le omanglal, te sai llana, o ko phenda le mai anglal te phena kai si chachipe? chachimaia niko ni phenda le ta niko ni sikada, ta niko ni asunda tumare alava.

²⁷ Me sema o purvo lleno kai sikada gala ezgode ando Sion, ta ando Jerusalem ka phenav e veseli viasta.

²⁸ Dikhlem, ta ni saia niko, ta puchlem, katar gala ezgode, ta ni saia iek lleno kai sikavel, puchlem len ta ni saia ko te phenel mange iek alav.

²⁹ Saurre ni mol len niso, ta e ezgode kai cheren inai niso, lenge slike kai si sargo balav ni mol len niso.