Isaias 40 - Biblia ande chib Romani

O Del del zor e Israele

¹ Len zor, len zor, tumen kai sen mo foro, gia phenel o Del.

² Den orba kai o lio katar o Jerusalem, phenen leke urkindo kai getosailo leko vreme, kai leko bilachipe si prostime, soke lia katar o Del dui droma e duk pala sa o bilachipe kai cherda.

³ Iek lleno urkil po pusto: Lacharen o drom e Gazdake, lacharen po pusto iek drom orta amare Devleke.

⁴ Suako umal te avel vazdini, ta peradino suako burdo, sogo si bango te avel ortome, ta e burdura te achen orta sargo iek umal.

⁵ Ka sikadol e zor e Devleki ta sa e manusa ka dikhen le. Soke o Del dia orba.

⁶ Iek lleno phenela: Urkisar. Ta me phendem leke: ¿So trubul te pheneu urkindo? Kai suako manus si sargo e char, ta sa leko baripe sargo e lulunlla katar o vos.

⁷ E char sukol, ta e lulunllin phuriol soke e balav e Devleki phurdel pe late, isto gia sargo e char si o foro.

⁸ Sukol e char, phuriol e lulunllin, a e alava katar amaro Del achen ostade.

⁹ Like pe iek baro burdo, porauka katar o Sion, vazde zurale cho avazi, porauka katar o Jerusalem, urkisar ta na dara, phen e foronenge katar o Juda: ¡Dikhen kate tumare Devle!

¹⁰ O Del o Gazda ka avel zoriaia, ta leko va ka gazdaril, anel pea o pochindipe, angla le avel soia ka pochinel.

¹¹ Sargo iek chobano ka arakhel pi stoka, ande pe va ka inllarel e bakren, ta ande po brek ka inllarel len ka arakhel lachimaia e bakrien kai avila len minone.

O Baripe katar o Del e Israeleko

¹² ¿Ko llinda e mora pe vastea Ta o miloso pe cheperkoia, trine naienchar chidia o prajo e phuviako, ta phariada e burdura ta zumada gachin phariaven e umalia?

¹³ ¿Ko sikada e Duo e Devleko, o ko sikada le so te cherel?

¹⁴ ¿Ko sikada le te llanel? ¿Ko sikada le o drom katar o chachipe, o sikada le o bizaipe ta o drom e llanglimako?

¹⁵ E phuvia si leke sargo iek kuchinorri paieki kai thavdel katar o bure, sargo o sano prajo upral pe so phariavelpe, ta ikanel e forura kai si pe mora sargo prajo.

¹⁶ Ni o Libano ni resela e iagake, ni sa leke zivirinie e kurbanoke.

¹⁷ Sa e phuvia inai niso angla le, sargo niso ka aven prema le, sargo kana inai.

¹⁸ ¿Prema so ka phene ka si o Del, savi ezgoda ka cheren te avel sargo vou?

¹⁹ Iek lleno bilavel o sastri ta cherel iek estatua, aver kai radil o rup ucharel la ando sunakai ta bilavel rup ta cherel lake lanchura.

²⁰ O lleno chorro, esviril te del le kotora kastenge kai ni chernion, rodel iekhe llene bizai kai llanel te radil te cherel iek estatua katar o kas ta te achel pe porrne.

²¹ ¿Ni llanen? ¿Ni asunden? ¿Nikada ni phende tumenge omanglal? ¿Ni sikade tumen sar kana cherdili e phuv?

²² Vou besel po kolo e phuviako, ta gola kai zivin pe late si sargo langoste, vou buliarel o miloso sargo iek chiti, inzarel le sargo iek chara te zivi.

²³ Vou zatril golen kai si zurale, ta golen kai gazdarin cherel te na mol len niso.

²⁴ Sargo kana iakom thode len ande phuv, sargo kana iakom barion lenge zile, sargo kana lengo kas nikada ni saia le zile ande phuv ta samo so phurdel pe lende peren ta e balav inllarel len sargo char suki.

²⁵ O Santo Del puchel: ¿Prema so ka phenen kai sem o savi ezgoda si sargo me?

²⁶ Vazden tumare akha upre, ta phenen ko cherda gola ezgode, vou ikanel ta llinel sa pe cheraien, saurren ikharel pe lengo anav, ni iek ni ka achel, gia bari si leki zor ta gia baro si leko gazdaripe.

²⁷ ¿Soke phene, ioi Jakob, ta phene, Israel: Mo drom si gurudino katar o Del, ta mo Del ni chinda mange kris?

²⁸ ¿Ni llanglan, ni asundan kai o Del ostade si o Gazda, kai cherda sa e phuv? Ni jasarel e vlaga ta ni chiniol nikada, ta niko nasti resel kai leko bizaipe.

²⁹ Vou del zor gole kai si chinio, ta del vlaga gole kai inai le ni iek zor.

³⁰ E chaurre jasaren e vlaga ta chinion, e terne chinion ta peren,

³¹ a gola kai uzdinpe ando Del ka avel len nevi zor, ka furian sargo e agila, ka prasten ta ni ka chinion, ta ni ka jasaren e vlaga.