Isaias 34 - Biblia ande chib Romani

E joli e Devleki po Edom

¹ Aven pase, phuvialen, thoven tumen pase te asunen, a tumen forura, asunen. Te asunel e phuv ta sa so si ande late, ta sa o bariol pe late.

² Soke o Del si joliariko pe sa e phuvia, ta si silno pe sa lake boñikura, ka zatril len ta ka del len kai o mundaripe.

³ Ta e mule katar lenge phuvia ka aven chudine, ta lenge esnage ka khanden ta e burdura ka bilaon pala lengo rat.

⁴ Sa e cheraia katar o miloso ka bilaon, ta ka ulilpe o miloso sargo iek lil, ta ka peren sa leke cheraia, gia sar peren e patra katar e drak, ta e patra katar o kas e simochinengo.

⁵ Soke ando miloso ka matol mo jarni, Ka fuliel po Edom e kris, po foro chinado te zatriv le.

⁶ O Jarni e Devleko si sa makhlo ande khoi ta rat e bakrengo ta busnengo, ande khoi katar e bubreskura katar e bakre e burdoke, soke e Devle si le kurbanura ande Bosra ta baro mundaripe ande phuv katar o Edom.

⁷ Ta lenchar ka mundardon guruva dive ta guruva ta goia phuv ka matol katar o rat ta o prajo ka achel sa makhlo ando khoi.

⁸ Soke avilo o vreme kai o Del ikanel pi duk, burs kai o Del pochinel ando maripe katar o Sion.

⁹ Ta leke paia ka cherdon turkali, ta leko prajo asufre, ta leki phuv ka cherdol turkali kai phabol.

¹⁰ Ni ka merel ni orachaia ni ollivesea, o thuv ka llal upre ostade, vicha pala e vicha ka avel zatrime, nikada ni ka nakhel niko latar.

¹¹ O pelikano ka gazdaril pe late ta o eriso, o puaucho ta o kuervo ka zivin kote, ta ka thoven pe late iek solo kai zatril ta ka mukel la orta sargo o pusto.

¹² Ka thoven o anav katar e glamne llene, glamne kai inai len charoina, ta sa lenge llene bare ni ka aven niso.

¹³ Ande lenge glamne chera ka barion e kasta karrnale, e char ta e karrne, ka aven ande lenge glamne chera, kote ka zivin e llukela dive ta ande bar katar o cher ka zivin e minone katar e avestruse.

¹⁴ E zivirinie dive ta e iena ka maladon ta o busne ka basen pe ogola busne, i o puaucho ka avel le iek than kote ta ka achel te besel esmiro.

¹⁵ Kote ka cherel peke kuibo o puaucho, ta ka ikanel pe minonen ta ka chidel len telal katar pe pakha, ta ka chidiniaon e chiriklia kai jan mas suako iek pe diskiniaia.

¹⁶ Roden o lil e Devleko, ta chitin dal si sa, ni iek ni achilo avri pe diskiniaia, soke vou phenda le, ta chidia len isto leko duo.

¹⁷ Ta suakoneke llinda iekhe solea ta dia iek umal te gazdarin la ostade, vicha pala e vicha ka zivin kote.