Isaias 3 - Biblia ande chib Romani

E duk kai lel o Juda ta o Jerusalem

¹ ¡Thoven sama! O Del kai si le sa e zor ka lel katar o Jerusalem ta katar o Juda e zor ta so trubul len, ka lel lendar sa o marrno ta o pai,

² ta e llene zurale, ka lel lendar o krisari ta o profeta, gua kai apogodil ta e phure,

³ gole kai gazdaril pe pinda ta e llene kai si len liubao, o glamno lleno kai cherel ezgode pe vastenchar ta gole kai llanel te del orba e llenenge.

⁴ Ka thovav lenge charura e ternen ta e chaurre ka aven lenge gazda.

⁵ Ta ka avel silnope maskar e llene ka marenpe e llenenchar kai zivin pasa lende, o terno ka marelpe e phurea, ta o chudino ka marelpe e barvalea.

⁶ Kana vareko istarela e vastetar pe phlale, katar e familia pe dadeki ta phenela lake: sukar furiado san, tu ka ave amaro glamno le ande che va ta dik tu katar gava phagipe,

⁷ Vou ka jal sovel ande gua llive ta ka phenel: me ni ka dikhav katar gala ezgode, soke ande mo cher inai ni marrno ni patave, na cheren man gazda katar o foro.

⁸ Soke o Jerusalem si sa phago ta o Juda pelotar, soke die orba ta cherde ezgode bilache karing o Del amaro charo ta cherde le te joliaol.

⁹ Lengo mui dosarel len, soke sikaven po bilachipe sargo e Sodoma, ta ni cherenpe. ¡Tesko katar lengo zivoto! soke chidie upral pe pete o bilachipe.

¹⁰ Phenen e chacheke kai ka llal lake sukar, soke ka jal katar e ezgode kai cherel.

¹¹ ¡A tesko e bilacheke! ka llal leke bilache, soke ka avel leke pochindo prema so cherel.

¹² E dusmanura me foroke si but, ta diskinie cherdile gazda letar. Foro kai san murno, gola kai inllaren tut angle kojaven tut ta bangaren che droma.

¹³ O Del ka chinel krisil ta thodape pe po than te krisil e foronen.

¹⁴ O Del ka chinel kris pe phure katar leko foro ta pe llene kai gazdarin, soke tumen jalen sa e drakha, ta e ezgode katar e chorre si ande tumare chera.

¹⁵ ¿So phenen tumen kai drobon me foro ta ustaven o mui katar e chorre? Gava phenenle o Del kai si le sa e zor.

E duk katar e diskinie katar o Jerusalem

¹⁶ O Del phenel gia: Soke e chea katar o Juda istardon ta vazden pi korr chak upre ta dikhen bilachimaia, kana phiren llan chelindo ta marenpe porrne pe phuv,

¹⁷ goleke o Del ka chinel e bal katar e chea katar o Sion, ta ka sikavel lengo lallao.

¹⁸ Ande gua llive o Del ka lel lendar e sukar ezgode kai thoven pe pe porrne, e mreziche ta e chonorra,

¹⁹ e sinlliria ta e chea ta e kore,

²⁰ o fuladipe, o furiadipe kai llal pe porrne e kanglia kai llan pe bal, e pamukura merisoke ta e cheorra,

²¹ e angrusta ta e chea kai llan po nak,

²² e fistanura kuch, e dikhle, e gertacha, e kisa,

²³ e geldale, e patave kuch, e bare dikhle ta e ta e gertacha.

²⁴ Po than katar o meriso sukar ka avel e para, ta iek solo po than katar o kavisi ta o soro jalo po than katar e sukar bal, po than katar glamne patave, e patave prajale ta o phabardipe po than katar o sukaripe.

²⁵ Che murusa ka meren po jarni ta chi zor po maripe ka perel kana ka lla te mare tut.

²⁶ Pe lenge udara ka avel e zalba ta o zalosno ni ka avel la niko ta ka achel pusti.