Isaias 25 - Biblia ande chib Romani

Llili kai blagosil e Devle

¹ Gazda, tu san mo Del, me blagosiv tut ta blagosiv cho anav, soke cherdan glamne ezgode, che orbe purane kai sikaven si chache ta zurale.

² Soke cherdan te cherdol o foro iek umpa, o foro zidome phaglan le, o foro kai saia drago e llenenge katar aver phuvia, te na avel ios foro, ta te na vazden le nikada ios.

³ Goleke ka blagosil tut o foro zuralo, ka daral tutar o foro kai si e llene zurale.

⁴ Soke sana o zido katar o chorro, zido katar o gua kai inai le niso ta si dukhado, o than kai gurudiva katar e bari balav, sana e senka po tatipe, soke e joli katar e silne si sargo iek bari balav kai chalavel po zido.

⁵ Sargo o tatipe ando sukipe, gia ka achen ando lallao e llene katar aver phuv, ta sargo o tatipe telal katar iek oblako ka chere te na asundol o llilabipe katar e silne.

⁶ Ta o Del kai si le sa e zor ka thovel iek sinia pe gava burdo sa e phuvienge, ka del len o mai lacho jape ta e mai lachi mol.

⁷ Ta pe gava burdo ka pharravel o chiti kai si ucharde sa e forura, ta o chiti kai ulil sa e phuvien.

⁸ O meripe ka avel zatrime ostade, ta o Del o Gazda ka kosel suako ausin kai si po mui, ta ka lel katar sa e phuv o lallao katar leko foro, soke o Del phenda le.

⁹ Ta ande gua llive ka phendol gia: Gava si amaro Del, adurichardam le ta ka braduil amen, gava si o Del kai aduricharaia, ka dragostiamen ta ka veseliamen ande leko braduipe.

¹⁰ Soke e Devleko va ka avel pe gava burdo, a o Moab ka avel ustado isto pe leko than, gia sar si ustadi e char suki po llubri.

¹¹ Ta ka inzarel po va po maskaral letar, gia sar inzarel po va gua kai plivil, ta ka peravel leko baripe ta o rado leke vastengo.

¹² Ta ka peravel leke bare zidura, ka peravel le pe phuv ta ka achel ando lallao.