Isaias 23 - Biblia ande chib Romani

Poroka katar o Tiro ta o Sidon

¹ Poroka katar o Tiro. Kukin llimie katar o Tarsis soke zatrime si o Tiro ta ni achel ni iek cher te de andre, gaia poroka likisti katar e phuv katar o Kitim.

² Na den orba gola kai zivin pasa e mora, gola katar o Sidon kai chinen ta bichinen ta nakhen e mora te chinen peke ezgode.

³ O lliu kai anena bariola e paiea katar o Nilo, ta sena e phuv mai zurali maskar e phuvia.

⁴ Lalla Sidon, soke e zor katar e mora dia orba, ta phenda: Nikada ni biandem ta nikada ni maladila mange, ta ni bariardem chaurren ni chorren.

⁵ Kana ka avel e viasta ando Ejipto, ka dukhal tumen so ka asunen katar o Tiro.

⁶ Nakhen kai o Tarsis, kukin tumen kai zivin pasa e mora.

⁷ ¿Ni saia gava tumaro foro veselo ta purano? Lake porrne ka inllaren le te zivil dur.

⁸ ¿Ko phenda gava katar o Tiro, kai saia e charonengi, ta kai lako rado cherenale e charura, ta chinena ta bichinena lake e mai glamne llene katar e phuv?

⁹ O Del kai si le sa e zor phenda le, ta sai peravel o baripe katar gola kai istardon, ta te zatril sa e glamne llenen katar e phuv.

¹⁰ Nak katar chi phuv, chei katar o Tarsis, soke ni ka avel tut ios zor.

¹¹ O Del inzarda po va uprl pe mora, cherda te izdran e phuvia, phenda katar o kanaan te aven zatrime lake zidura.

¹² Ta phenda: Ni ka veseli tut ios, chei dukhadi katar o Sion, uste te nakhe kai o Kitim kai ni kote ni ka che esmiro.

¹³ Dik e phuv katar e Kadeura. Gava foro ni saia omanglal, e Asiria cherda la e llenenge kai zivina po pusto. Vazdie pe zidura, cherde pe chera, vou cherda te achel zatrime.

¹⁴ Kukin, llimie katar o Tarsis, soke phage si tumare zidura.

¹⁵ Ande gola llivesa ka avelpe kai o Tiro ka avel bristardo eftavardes burs, so zivil iek charo. Mapalal katar e eftavardes burs o Tiro ka llilabel iek llili kurvichkaki.

¹⁶ Le e arpa, ta lla truial katar o foro, kurvichka bristardi, cher iek sukar llili, llilabe pale te denpe golli tutar.

¹⁷ Ta kana ka nakhen e eftavardes burs o Del ka avel kai o Tiro, ta pale ka chinel ta ka bichinel, ta pale ka cherel o kurvaluko sa e phuvienchar kai si pe phuv.

¹⁸ A lengo rado ta sa so ka dobin ka avel dino e Devleke, ni ka guruven le ta ni ka phanden le, soke lako chari ka avel golenge kai sea angla o Del, te jan ta te chalion, ta te furiadon ande glamne patave.