Isaias 22 - Biblia ande chib Romani

E poroka katar o Jerusalem

¹ E poroka katar e umal e sunengi. ¿So si chuke kai likistan upral po cher che llenenchar?

² Tu kai san iek foro vreno ta veselo, divome, kai niko ni mulo po jarni, ta ni mule po maripe.

³ Sa che glamne llene nasle ande iek than te na mundaren len e llide, sa gola kai sea andre phangle len pe umpe kana mangena te nasen.

⁴ Goleke mangav te muken man soke mangav te rovav ando baro avazi, te ma troman te den man zor pala e zatrania katar mo foro.

⁵ Soke o Del kai si le sa e zor anda amenge ande gava llive e burkania, e duk ta e briga, ande umal katar e sune, te phagel o zido ta te urki karing o burdo.

⁶ O Elam inllarel e aljaba, e bordonenchar ta e llenenchar pe gra, a o Kis ikanda o eskudo.

⁷ Che sukar llene pherdile bordona, ta gola kai llan pe gra logle pasa o udar.

⁸ Ta pucharda te dikhol o Juda ta dikhilo o cher ando vos kai guruven e ezgode kai marenpe lenchar.

⁹ Ta dikhlen e thana putarde katar o foro e Davideko sar cherdona mai but ta chidian o pai kai chidiniaol tele.

¹⁰ Ta llindan e chera katar o Jerusalem, ta phaglan e chera te lachare o zido,

¹¹ anadan maskar e dui zidura te nakhel o pai katar o purano than kai chidiniaola o pai, ta na avila chuke liubao pala gua kai cherda le ta ni dikhlan duratar gole kai radisarda te cherdol.

¹² Goleke o Del kai si le sa e zor ikharda len allive te roven ta te kukin, te jaliaren po soro ta te thoven patave zalosne,

¹³ a maskar tumende si dragostia ta veselia, jan mas ta pien mol mudaren guruvmien thulen ta chinen e korra katar e bakre ta phenen: Ja ta pia soke thiara ka mera.

¹⁴ Gaia ezgoda phenda la mange o Del kai si le sa e zor: Kai gava bilachipe ni ka avel tumenge prostime lligo ni ka meren.

Pharuven golen ka radin ande charoina

¹⁵ O Del kai si le sa e zor phenel gia: Lla ta de kote kai si gua barvalipe ta lla kai o Sebna ta phen leke gia:

¹⁶ ¿So si tut kate, o ko si tut kate, kai cherdan chuke iek limori, soke san pe iak than vazdino ta chere cho limori soke anavel ando barr te chere chuke iek than?

¹⁷ O Del kai si le sa e zor ka inllarel tut phanglo zoriaia ta ka ucharel cho soro,

¹⁸ ka chudel tut te taulli tut zurale sargo iek barr ande iek bari umal, kote ka mere ta kote ka aven e bordona katar cho baripe, tu kai san o lallao katar cho gazda.

¹⁹ Ta ka chudav tut katar cho than ta ka ikanav tut katar cho rado.

²⁰ Ande gua llive ka ikharav me sluga o Eliakin chavo katar o Ilsias,

²¹ ta ka thovav pe lete che patave ta ka thovav ande leko va le cho gazdaripe, ta ka avel sargo dad e llenenge katar o Israel ta e foroke katar o Juda.

²² Ka thovav pe leke zea klucho katar o foro e Davideko, ka phandel ta niko ni ka putarel, ka putarel ta niko ni ka phandel.

²³ Kote kai ka thovav le ka achel zuralo sargo iek kafrin, ta ka avel iek trono liubaimako katar pe dadeko cher.

²⁴ Pe lete ka umbladol sa o liubao katar leke dadeko cher, e chave ta e unukura sa e tasura minone, katar e tasura llik kai e suako jarro.

²⁵ O Del kai si le sa e zor phenel kai ande gua llive o kafrin kai si thodo po than zuralo, ka avel ikando, ka avel phago ta ka perel, ta o pharipe kai saia thodo pe lete ka perel ta ka phagol, o Del phenda le.