Isaias 21 - Biblia ande chib Romani

E poroka po foro Babilonia

¹ Poroka katar o pusto e morako, sargo e bari balav katar o Negev, gia avel katar o pusto, katar e phuv kai daravel

² Bari ezgoda sikada mange o Del. Gua kai phagel po alav kojavel, gua kai cherel zatrania zatril. Uste Elam, Mar tut Media, na auchin tumen ios.

³ Goleke dukhan man me zea, pherdilem briga, sargo e briga katar iek khamni, chinilem kai asunav, ta darailem so dikhav katar so dikhav

⁴ Mo lio chudisailo, merav daratar, o sil kana perel e riat kai gia saia mange drago, akana daravel man.

⁵ Lacharen e sinia, buliaren o chiti, jan, pien. ¡Usten, glamne llene len tumaro eskudo!

⁶ Soke o Del phenda mange gia: Lla ta thov iekhe llene te dikhel ta te phenel amenge so ka dikhel.

⁷ Dikhla llenen, llene kai llana dui po dui, ta llana upral pe magarchura ta pe deve, ta thodape te dikhel mai sukar,

⁸ ta urkisarda sargo liono: Gazda, po than katar dikhav sem sorro llive, ta sorro riat prezou pe mo than,

⁹ aven llene pe gra, aven dui po dui. Mapalal dia orba ta phenda: Pelitar, pelitar e Babilonia, ta sa lenge dela phagla len pe phuv,

¹⁰ ¡Ioi foro murno! ustado ta chudino, phendem chuke so asundem katar o Del kai si le sa e zor, o Del katar o Israel.

Poroka katar e Duma

¹¹ Poroka katar e Duma. Urkin katar e Siria: Tu kai arakhe, ¿so llalpe ande riat? tu kai arakhe, ¿so llalpe ande riat?

¹² Gua kai arakhel phenda: Avel e thiarin, ta mapapal e riat, puchen te mangea, puch, irisao, aide.

E poroka po pusto

¹³ Poroka katar o Ejipto. Ando vos ka nakhen e riat ande Arabia, tumen kai sen katar o Dedan ta phiren.

¹⁴ Liken te maladon e trusalea, inllaren leke pai, tumen kai zivin ando Tema, den marrno gole kai nasel.

¹⁵ Soke nasel katar o jarni ostro, angla o arko chirdino, kai nasel katar o maripe.

¹⁶ Soke gia phenda mange o Del: Katar llik kai iek burs, gia sar si o burs katar gua kai pochinen leke, ka avel zatrime sa o baripe katar o Sedar.

¹⁷ Ta ka cherdon cherricha e llene tromane kai chiden e llide, chave katar o Sedar, soke gia phenda le o Del o gazda katar o Israel.