Isaias 2 - Biblia ande chib Romani

O Del ka cherel te avel e pas maskar e phuvia

¹ Gala si e ezgode kai o Isaias chavo katar o Amos, dikhla katar o Juda ta katar o Jerusalem.

² Ande llivesa kai ka aven mai angle, ka avel thodo o burdo katar o cher e Devleko upral pe burdura, ta ka avel blagosime pe burdura ta ka prasten lete sa e phuvia.

³ Ta ka aven but phuvia ta ka phenen: lika po burdo e Devleko, kai o cher katar o Del e Jakobeko, ta ka sikavel amen pe droma ta ka phira pe leke droma. Soke katar o Son ka likel o zakono, ta katar o Jerusalem o alav e Devleko.

⁴ Ta ka krisil maskar e phuvia ta ka del pe but phuvia, ta lenge jarnia ka cherel len sastri kai putaren lea e phuv, ta lenge lanse ka cherel len churia bangarde kai chinen o lliu, ni ka marenpe e jarnienchar phuv phuviaia, ta ni ka sikon ios te marenpe.

⁵ Aven tumen kai sen o foro katar o Jakob ta phira po villelo e Devleko.

E duk katar e barikane

⁶ Tu muklan che foro, o cher katar o Jakob soke sen pherde katar o sikadipe kai anden katar e forura kai perel o kham ta katar e llene chirimatarke sargo e filisteura kai cheren arli e llenenchar katar aver phuvia.

⁷ Lengi phuv si pherdi rup ta sunakai lengo barvalipe si billindo. Ta lengi phuv si pherdi gra ta lenge bordona si billinde.

⁸ Ta lengi phuv si pherdi dela, ta den changenchar angla e ezgode kai von cherde ta angla so von cherde pe vastenchar.

⁹ E manusa bangile ta e llene achile ando lallao, goleke na prostisar len.

¹⁰ Thou tut maskar e barra, gurudo ando prajo, te na ave pasa e dar e Devleki ta pasa leko glamno villelo.

¹¹ O baripe katar e akha e manuseke ka aven zatrime ta e barikane ka aven thode ando lallao, ta samo o Del ka avel blagosime ande gua llive.

¹² Soke o llive katar o Del kai si le sa e zor ka avel pe sa e barikane ta pe gola kai istardon, pe sa e gola kai cheren baripe ta ka aven zatrime,

¹³ pe suako kas katar o sedro kai si ando Libano ta pe sa e kas katar e ensina kai si ando Basan,

¹⁴ pe sa e bare burdura ta pe suako burdo vazdino,

¹⁵ pe suako cher baro ta pe suako zido baro,

¹⁶ pe suako llimia ta pe suako llimia kuch.

¹⁷ O baripe e manuseko ka avel zatrime ta e llene barikane ka aven thode ando lallao, ta samo o Del ka avel blagosime ande gua llive.

¹⁸ Ta ka ikanel sa e delen.

¹⁹ Ta ka urrinpe maskar e barra ta ando putardipe katar e phuv, katar e dar e Devleki, ta katar leko blagosipe kai klichil, kana ka thovelpe pe porrne te dukhavel e phuvia.

²⁰ Ande gua llive o manus ka chudel kai e misiakura kai llan telal katar e phuv ta kai misiakura kai furian pe dela rupune ta pe dela sunakune kai vou cherda te blagosin len,

²¹ ta ka urrilpe ando putardipe katar e zidura ta maskar e barra kai si putarde, pala o glamno Del, ta pala leko glamno klichipe, kana ka thovelpe pe porrne te dukhavel e phuvia.

²² Na uzdisao ios ando manus kai te na disil merel, soke ¿so mol le?