Isaias 16 - Biblia ande chib Romani

E llene katar o Moab gurudon ando Juda

¹ Bichalen bakre kai o gazda e phuviako, katar o b pusto llik kai o burdo katar e chei katar o Sion.

² Ta sargo iek chirikli kai nasel daratar katar po kuibo, gia ka aven e chea katar o Moab pe paia katar o Arnon.

³ Chide e llenen ta chin iek kris. Ollivesea thov chi senka te avel sargo e riat ta guruv e llenen kai inai len phuv na golen kai inai len kai te zivin.

⁴ Te zivin tuia me llene kai inai len phuv, ¡Ioi Moab! te ave tu o than kai te gurudon katar gua kai zatril, soke gua kai dukhavel ka merel, ta gua kai zatril ka avel leko son, soke o silno ka ni ka avel ios phuv.

⁵ Ta o trono ka avel thodo ande zalba, ta kote ka besel ta ka avel zuralo ande cher e Davideko, gua kai ka krisil ta ka rodel e kris ta ka sigarel te avel o chachipe.

⁶ Asundam o baripe katar o Moab, but baro si leko baripe ta sar istardol, a leko kojaipe ni ka avel le zor.

⁷ Goleke o Moab ka kukil, sa o foro ka rovel, ka roven surale ta ka phagon zalbatar, pala e marrne drakhenge kai cherena ando Kir jareset.

⁸ Soke jaliarde e umalia katar o Jesbon ta e drakha katar o Sibema, e glamne llene katar e phuvia ustade lake krangura kai reslea llik kai o Jaser, ta barile po pusto, barile lake patra ta nakhle e mora.

⁹ Gpleke ka rovav sargo o Jazer pala e drakha katar o Sibema, me ausa ka peren pe tute, ioi Jesbon ta Eleale, soke pe so bariol pe chi phuv ta pe si chidian ka perel o urkipe katar gola kai marenpe,

¹⁰ e dragostia ta e veselia si ikande katar e umal e lachi, ni ka llilaben pasa e drakha ta ni ka veselinpe, o lleno kai ustavel e drak ni ka cherel le ios, cherdem te achel o urkipe katar o lleno kai cherel e mol.

¹¹ Goleke mo lio izdral sargo iek arpa pala Moab ta basel pala o Kir Jares.

¹² Ta kana ka dikhol o Moab chinio pe thana vazdine, kana ka avel kai po santuario te mililpe, ni ka mol leke niso.

¹³ Gaia si e orba kai dia o Del katar o Moab sar kana saia gua vreme,

¹⁴ a akana o Del phenel gia: Ande trin burs, sargo e bursa katar iek lleno kai radil, ka avel zatrime e zor katar o Moab, ta i sa lake but llene ta gola kai ka achen ka aven cherricha, minone ta ni ka avel len zor.