Isaias 14 - Biblia ande chib Romani

Irinpe katar o pusto

¹ Soke e Devleke ka avel zao katar o Jakob ta pale ka esviril e Israele ta ka cherel le te zivil ande pi phuv ta ka llan lenchar llene katar aver phuvia ta ka aven thode ande vicha katar o Jakob.

E espurnia po charo katar e Babilonia

³ Ta ando llive e Devleko te cherel tut te ave esmiro katar cho rado ta katar chi dar ta katar e duk kai die tut te ave sluga dukhado,

⁴ ka phene gala sukar alava te mare espurnia katar o charo katar e Babilonia: ¡Savo son avilale o bilacho, savo son avila le o foro barikano!

⁵ O Del phagla e zor katar e bilache, o gazdaripe katar e glamne llene,

⁶ gua kai dukhavela e foronen suako llive, gua kai gazdarila pe phuvia silnomaia ta llala pala e llene bizaoia.

⁷ Sa o sueto si esmiro ta ande pas ta llilabie veselimatar.

⁸ Llik e kasta siprese veselisaile pala tu ta e sedrira katar o Libano ta phenena gia: Sar kana tu mulan, niko ni avel te chinel amen.

⁹ O limori incha tele darailo tutar, llungada mulen te liken te dikhen tut katar tu ka ave, cherda te usten katar pe stoliche sa e glamne llene katar e phuv, sa e charura katar e phuvia.

¹⁰ Saurre ka urkin ta ka phenen: ¿I tu jasardan e zor sargo amen ta cherdilan sargo amen?

¹¹ Cho baripe fulisto ando limori ta cho basaldipe katar che arpe, chi postelia ka aven cherme ta e cherme ka ucharen tut.

¹² ¡Sar pelantar katar o miloso cherain, chavo katar e thiarin peradino avilan pe phuv, tu kai cherea e phuvien te jasaren pi zor!

¹³ Tu kai phenea ande cho lio: Ka llav ando miloso, chak upre, pasa e cheraia e Devleke, ka vazdav mo trono ta po burdo katar o alav chacho ka besav karing e thana katar o norte.

¹⁴ Chak upre kai e oblakura ka likav ta ka avav sargo o Del,

¹⁵ A tu san peradino chak kai o limori ande thana katar e jar.

¹⁶ Ka den tenemava angla tu gola kai ka dikhen pe tute ta kana ka dikhen tut ka phenen: ¿Gava si o lleno kai cherela te dermolpe e phuv ta kai izdravela e phuvien,

¹⁷ kai cherda te achel e phuvia sargo o pusto, kai zatrisarda lenge forura, kai nikada ni mukliarda lenge phanglen?

¹⁸ Sa e charura katar e phuvia, saurre mule ando liubao ta akana suako iek si ande po limori,

¹⁹ a tu tradino san katar cho limori sargo iek kastorro chudino, sargo e patave katar e llene mule po jarni, kai chudie len chak andre ando limori, sargo e esnage katar e mule kai ustade len.

²⁰ Tu ni ka ave llindo lenchar ando limori soke tu zatrisardan che phuvia, mundardan che foro. Nikada ni ka den po anav e llenen katar o porodo e bilachengo

²¹ Lacharen lenge chaurren te mundaren len, pala lenge dadengo bilachipe, na usten ta te na avel lengi e phuv ta te na pheren forura e phuv.

²² Soke o Del kai si le sa e zor phenel gia: me ka vazdiniaivav pe lende, ta ka ikanav katar e Babilonia lako anav ta kogo achel, chavo ta unuko.

²³ Ta ka cherel te achel sa ando pai ta ande thana paiastale, ta ka metiv la e metlaia katar e zatrania, gia phenel o Del kai si le sa e zor.

E Asiria ka avel zatrime

²⁴ O Del kai si le sa e zor jala sovel ta phenda: Ka cherdol gia sar mislisailem, ta ka avelpe gia sar me manglem,

²⁵ Ka phagav e Asirio ande mi phuv, ta ka ustavav le pe me burdura, ka ikanav o pharipe katar lenge zea ka mukliarav me foro katar leko pharipe.

²⁶ Gava si so chindem pe sa o sueto ta gava si o va inzardo pe sa e phuv.

²⁷ Soke o Del kai si le sa e zor manglale gia, ¿Ta ko ka achavel le? Ta leko va inzardo ¿Ko ka cherel te lel le kotar?

E poroka pe filisteura

²⁸ Gaia poroka saia kana mulo charo o Ajas,

²⁹ na veselisao tu, sa e Filistea pala o meripe katar gua kai dukhavela tut, soke katar likisto o sap ka likel aver sap ta ka likel latar iek sap kai furial.

³⁰ Ta e purve chaurre katar e chorre ka avel len char ta gola kai inai len niso ka inzon esmiro, a me ka cherav te merel bokhatar che zile ta ka zatriv so achela tutar.

³¹ Auchisao udar, urkisar foro, sa phagi achilan Filistea, soke katar o norte ka avel o thuv ta ni ka achel ni iek kote kai chidiniaon.

³² ¿Ta so ka phendol golenge kai aven katar aver phuvia? Kai o Del cherda o Sion, ta kai late ka aven e llene dukhade katar leko foro.