Isaias 13 - Biblia ande chib Romani

Poroka katar e Babilonia

¹ E poroka katar e Babilonia, sikadi e Isaiseke chavo katar o Amoz.

² Vazden iek baro bariako upral pe iek baro burdo, urkisaren pe lende, vazden tumare va te sai den katar e udara katar e charura.

³ Me bichaldem me llenen kai si mange chinade, ta ikhardem e llenen e tromane kana sem joliariko gola kai veselinpe ande mi zor.

⁴ Asundon but llene pe burdura, sargo iek baro foro, but zurale asundon asundol sargo but phuvia chidine, o Del kai si le sa e zor llinel pe llenen kai si te llan te marenpe.

⁵ Aven but duratar katar iek phuv, aven katar o than mai dur katar o miloso, o Del ta gola kai ka cheren prema leki joli, aven te zatrin sa e phuv.

⁶ Auchin tumen soke pase si o llive e Devleko, ka avel sargo e zatrania katar o Del kai si le sa e zor.

⁷ Goleke suako va ka jasarel po zor, ta ka jasarel e vlaga suako manus.

⁸ Ta ka pherdon dar, a e nuzda ta e duk ni ka mukel len ka dukhal len sar dukhal iekhe diskinia kana maladol lake, iek averetar ka chudinpe, lenge muia ka phabon sargo iag.

⁹ O llive e Devleko avel, glamno llive, llive katar e bari joli, kai ka pharrudol gaia phuv ta ka cherdol pusti ta ka ikanel latar lake bilache llenen.

¹⁰ Ta e cheraia kai si ando miloso ta leke villelura ni ka klichin, ta o kham ka cherdol truniariko kana ka likel ta o chon ni ka kletosarel.

¹¹ Ta ka dukhavav e sueto pala po bilachipe ta e bilachen pala lengo bilachipe ta ka cherav te achavav o baripe katar e llene kai istardon, ta ka zatriv o baripe katar e zurale.

¹² Ni ka malave ni iekhe muruse, e manusa ka aven sargo o mai lacho sunakai, sargo o sunakai katar o Ofir.

¹³ Soke ka cherav te dermolpe o miloso ta ka miskolpe e phuv katar po than, ande joli katar o Del kai si le sa e zor ta ando llive katar leki bari joli.

¹⁴ Ta sargo iek gasela kai llan pala late ta sargo iek bakro kai inai le chobano, suako lleno ka dikhen karing po foro ta suako lleno ka nasel kai pi phuv.

¹⁵ Kogo ka avel malado, ka avel jirado pe lansa ta kogo ka llal phanglo ka merel po jarni.

¹⁶ Isto angla lende ka chalaven lenge minonen ande phuv, ka choren so si len ande lenge chera ta ka den ando lallao lenge diskinien.

¹⁷ Me ka vazdav pe lende e llenen katar e Media kai ni ka thoven sama po rup ta ni po sunakai.

¹⁸ Ka chuden e arkoia ande minone, ni ka avel lenge zao katar lenge minone ta ni ka chitilpe lenge katar lenge chaurre.

¹⁹ Ta e Babilonia, e mai sukar katar e phuvia ta o sukaripe ta o baripe katar e Kadeura, ka avel sargo e Sodoma ta e Gomorra, gola forura kai o Del zatrisarda.

²⁰ Nikada ios ni ka zivin kote ni chave, ni unukura, ta ni ka inzarel pi chara kote o arabe, ta ni o chobano ni ka aven le kote rindo,

²¹ kote ka zivin e zivirinie katar o pusto ta lenge chera ka pherdon llukela dive, kote ka zivin e avestrus ta ka juten e busne dive.

²² Ande lenge bare chera ka auchinpe e iene ta ande chera kai llana te veselinpe ka aven e llukela dive, pase si lengo vreme ta lenge llivesa si llinde.