Isaias 10 - Biblia ande chib Romani

¹ ¡Tesko golenge kai cheren zakonura kojamne ta kai pisin o kojaipe,

² te ikanen katar e kris e llenen chorre ta te muken pe iek rig e llenen kai si ande nuzda ande mo foro, len sa katar e phivlia ta choren e minonen bidadenge!

³ ¿A so ka cheren ando llive katar e duk? Ta kana ka avel duratar e zatrania, ¿kate ka llan te pomozil len? ¿Kai ka muken po barvalipe?

⁴ Bi murno ka bangon lenge changa maskar e phangle ta ka peren maskar e mule. A sa gale ezgodenchar e Devleki joli ni achel ta lenko va si vazdino.

O Del dukhavel e Asiriaia

⁵ ¡Ioi Asiria! kai san e rovrli katar mi joli, ande cho va si mi joli.

⁶ Ka bichalav la kai iek phuv bilachi, ka bichalav la po foro kai si mange joli, te lel lendar so chorde ta so si len, ta te mukel te ustaven len sargo o glibo kai si pe droma.

⁷ I te na mangel te cherel le gia ta te na mislilape ande po lio te cherel le, ande leko mislo ka mangel te ikanel ta te zatril but phuvien.

⁸ Soke vou phenel gia: ¿inai sa charura me glamne llene?

⁹ ¿Inai o Kalno sargo o Karkemis, o Lamat sargo o Arfad, ta e Samaria sargo o Damasko?

¹⁰ Gia sar dobisardem e charoine katar e dela, kai lenge slike sea mai but neko ando Jerusalem ta e Samaria.

¹¹ Gia sar cherdem ande Samaria ta ane lenge dela, ¿ni ka cherav isto gia ando Jerusalem ta ande lenge dela?

¹² A kana ka getol sa pi buchi po burdo katar o Sion ta ando Jerusalem, ka dukhavel e charo katar e Asiria soke si but baripe ande leko lio ta istardol kana dikhel pe llene.

¹³ Soke o charo phenda: Ande mi zor cherdem le, te me bizaimaia, soke sem llanglo, liem e phuvia katar e forura ta liem lengo barvalipe ta sargo iek tromano peradem e llenen kai gazdarina kote,

¹⁴ Istardem sargo iek kuibo o barvalipe lenge phuviengo, sargo kana chide e arnorre kai mukle len, gia liem mange sa e phuv ta niko ni putarda po mui te phenel vareso.

¹⁵ ¿Sai mislil o tover kai si mai glamno neko gua chinel lea? ¿O o jarni neko gua kai miskol le? ¿Sar ka inllarel e rovli e llene kai inllarel la? ¿Sar ka gazdaril iek kotor kas e manuse kai inai kastuno?

¹⁶ Goleke amaro Del kai si le sa e zor, ka cherel te jasaren e zor e llene zurale, ta tala leki zor ka cherel te phaol iek iag sargo kana phabol iek plameko.

¹⁷ Ta o villelo latar o Israel ka avel e iag ta leko Santo sargo plameko kai ande iek llive ka phabarel lenge karrne ta lenge kasta karrnale.

¹⁸ Lengo glamno vos ta lengi umal zeleni sa ka phabol, duo ta esnaga, ta ka avel sargo kana vazden iek chiti parrno kana jasaren.

¹⁹ Ta gia cherricha kasta kai ka achen kai iek minono sai ka llinel len.

²⁰ Ande gola llivesa ka avelpe kai gola kai ka achen katar o Israel, ta gola kai ka achen katar o cher e Jakoboko nikada ios ni ka uzdinpe ande gua kai dukhada len, von ka uzdinpe chachimaia ando Del, o Santo katar o Israel.

²¹ Nesave ka irinpe, nesave katar o Jakob ka irinpe kai o Del o zuralo.

²² Ioi Israel, te si cho foro zuralo sargo e chisai e moraki, gola kai si leke ka irinpe, ta e zatrania kai si chinadi ka pherdol chachipe.

²³ Soke o Del kai si le sa e zor, ka cherel e zatrania kai chinada po maskaral katar e phuv.

²⁴ Goleke o Del kai si le sa e zor phenel gia: Foro murno kai zivi ando Sion, na dara katar e Asiria. Iekhe kastea ka dukhavel tut ta po kas ka vazdel pe tute gia sar cherda le o Ejipto.

²⁵ A cherricha mai angle ka phagol mi joli pe tu, ta von ka aven zatrime.

²⁶ O Del kai si le sa e zor ka vazdel o bicho pe lete sargo o mundaripe katar o Madian po barr katar o Oreb, ka vazdel pi rovli pe mora gia sar cherda po drom katar o Ejipto.

²⁷ Ande gua vreme leko pharipe ka avel ikando katar che dume, ta i leko kas kai si pe cho soro ta gua kas ka avel zatrime.

E Asiriura llan angle

²⁸ Avilo llik kai o Aiat, nakhlo llik kai o Migron, ka llinel pe boñikura.

²⁹ Nakhle o pai llumbava, racharde ando Geba, O Rama dermosailo, o Gabaa naslo katar o Saul.

³⁰ Urkisar ando baro avazi, chei katar o Galim cher te asundol chak ando Lais, iani Anatot.

³¹ E Madmena izdrai, e llene kai zivin ando Gebin nasen.

³² Avel o llive kana ka besel ando Nob, ka vazdel po va po burdo katar e chei katar o Sion, pe umal katar o Jerusalem.

³³ A o Del kai si le sa e zor, ka phagel e krangura silnomaia, ta e kasta mai bare ka aven chinde ta e mai bare ka achen ando lallao.

³⁴ Ta iekhe toverea ka chinel o thulipe katar o vos ta o Libano ka perel zurale.