Galatas 6 - Biblia ande chib Romani

Pomozisaren iek avere

¹ Phlalalen, te dikhen kai vareko si ande varesavo bilachipe, tumen kai sen ando Duo morabi pomozin le te ortolpe. Ta cheren le postenimaia. Ta suako lleno te del orba bizaimaia, soke i vou sai avel thodo ando zumadipe.

² Pomozisaren tumen maskar tumende kana ka aven ande nuzda ta gia ka kanden o zakono e Kristoko.

³ Kana vareko mislilape kai si vareso kana vou inai niso, vou pe kojavel.

⁴ Suako lleno si te chinel kris vou peke, a te acharela kai sai veselilpe katar vareso kai cherel, te na mislil kai si mai lacho neko aver llene.

⁵ Soke suako lleno inllarel po pharipe.

⁶ O lleno kai sikaven le katar e Devleke alava, morabi te fulavel sa o lachipe kai lel e llenea kai sikavel le.

⁷ Na kojadon: niko nasti kojavel e Devle soke so tu de, gua le.

⁸ Kogo llal pala pe bilache ezgode, katar gola bilache ezgode ka lel o meripe. A kogo llal e Duoia, ka lel katar o Duo o zivoto ostade.

⁹ Goleke morabi te chera o lachipe ta te na chiniva, soke te na jasardam e zor, ka avel o vreme ta o Del ka del amen amaro chari.

¹⁰ Goleke te sai cherdam o lachipe saurrenge, cherale, a mai anglal cherale e llenenge kai si amare phlal ando pachape.

¹¹ ¡Dikhen tumen gia bare letre akana pisiv tumenge isto me!

¹² Gola kai mangen tumendar te cheren e sirkunsision pe zor, von cheren le samo te na joliaon pe lende e llene ta te na aven mardine cheres o krusto e Kristoko.

¹³ A ni gola kai sirkunsidinpe ni cheren sa so phenel o zakono. A von mangen tumendar te sirkunsidin tumen samo te falinpe kai cherde tumen pe zor te inllaren pe tumari esnaga gua chindipe.

¹⁴ A me ni kamam te faliu man katar niso samo katar o krusto e Gazdako o Jesukristo, soke cheres o krusto e Kristoko, o sueto mulo mange ta me mulem e suetoke.

¹⁵ Ni mol nisoke te cherdan o ni cherdan e sirkunsision. So mol si kai o Del cherda amen te zivi pale.

¹⁶ O volipe ta e zalba e Devleki te avel sa e llenenchar kai llan prema gala ezgode, ta sa e llene katar o Israel e Devleko.

¹⁷ Katar angle ni kamam niko te del man joli, soke pe mi esnaga inllarav sa o mardipe ta e patnia kai nakhlem soke sem e Kristoko.

¹⁸ Phlalalen, o Del te blagosil tumen ta te del tumen katar po volipe. Gia te avelpe.