Galatas 4 - Biblia ande chib Romani

Akana ni sam esluge sam chave e Devleke

¹ So mangav te phenav si, kai kana iek lleno kai si te achel leke sa so si leke dadeko ta si ternorro, gua lleno si sargo iek esluga makar avela o gazda katar sa.

² Si llene kai arakhen le ta arakhen leke ezgode, lligo ni ka phenel leko dad kai avilo o vreme kai vou sai gazdaril.

³ Isto gia si amenchar: kana sama ternorre sama esluge katar e zakonura gale suetoke.

⁴ A kana avilo o vreme, o Del bichalda pe Chave kai biandilo katar iek diskinia ando zakono e Moiseseko,

⁵ te braduil amen katar o zakono ta te del amen e dragostia te ava chave e Devleke.

⁶ Ta soke akana sam leke chave, o Del bichalda ande amare lie pe Chaveko Duo kai ikharel e Devle gia: ¡Abba! ¡Dade!

⁷ Goleke akana ni san esluga, san e Devleko chavo. Ta soke san leko chavo leki volia si te le so ka mukel chuke.

⁸ Omanglal kana tumen ni pinllarena e Devle, sena esluge katar e dela kojamne.

⁹ A akana kai tumen pinllarden e Devle, o sai phena, akana kai o Del pinllarda tumen, ¿soke muken te gazdarin pale pe tumende gola dela kojamne ta soke mangen te aven pale lenge esluge?

¹⁰ Tumen cheren eslave nesave llivesa chona ta bursa.

¹¹ ¡Si mange dar te na mol le niso o rado kai cherdem maskar tumende!

¹² Phlalalen, mangav tumendar te aven sargo me, soke me cherdilem sargo tumen. Tumen ni cherden mange nisavo bilachipe.

¹³ Tumen llanen kai e purvo drom kai diem tumenge orba katar e lachi viasta cherdem le soke sema nasualo.

¹⁴ Ta gua nasualipe avila iek zumadipe tumenge, soke ni muklen man korkorre pala mo nasualipe, tumen avilen manchar pachivale ¡Sargo kana me sema isto o Kristo Jesus!

¹⁵ ¿Kai tali e veselia kai saia tumen? Gia lache sena manchar kai sai ikandena tumare akha te den len mange.

¹⁶ A akana cherdilem tumaro dusmano samo soke phenav tumenge o chachipe.

¹⁷ A gola kai mangen te pharruven e lachi viasta mangen te aven tumenchar, a lenge mislura si bilache. Von mangen te duriaven tumen amendar ta ondaka tumen te mangen te aven lenchar.

¹⁸ Sukar si te mange te ave avere llenenchar, ta te cherele lache misloia sa o vreme a na samo kana sem maskar tumende.

¹⁹ Chaurralen, pale dukhal man sargo kana dukhal iekhe diskinia kana bianel, lligo ni ka aven sargo o Kristo.

²⁰ ¡Gia voliva te avav isto akana tumenchar te dav tumenge orba avere alavenchar, soke ni llanav so te misliu tumendar!

So si amenge e Agar ta e Sara

²¹ Tumen kai mangen te cheren so phenel o zakono, phenen mange iek ezgoda: ¿Nikada ni asunden so phenel o zakono?

²² O zakono phenel kai o Abraam avila le dui chaurre, iekheki dei saia e Agar kai saia e esluga, a ogoleki dei saia e Sara rromi e Abraameki.

²³ E eslugako chaurro biandilo prema e volia e manusengi. A o chaurro golako kai ni saia esluga biandilo te cherdol so phenda o Del kana dia po alav.

²⁴ Gua avilape gia te llangliolpe iek ezgoda. E dui diskinie si sargo dui droma kai delpe o alav, iek saia o alav kai diape po burdo o Sinai, kai si sargo e Agar, goia kai saia e dei katar gua minono kai saia te avel esluga.

²⁵ Soke e Agar si sargo o burdo o Sinai kai si ande Arabia kai akana si sargo o Jerusalem, soke gua foro ta e llene ta lenge minone si esluge.

²⁶ A o Jerusalem kai si ando miloso inai esluga, ta amen sam lake chave.

²⁷ Soke ando Pisipe phenel: Veselisao diskinia kai inai tut minone. Urkisar veselimatar, tu kai nikada ni llanglan e duk kana bianen, Soke e diskinia kai mukle la ka avel la mai but chaurre neko e diskinia kai si zinime.

²⁸ Phlalalen, tumen sen sargo o Isaak, tumen sen e chave kai o Del phenda kana dia po alav.

²⁹ A isto sargo ande gola llivesa kana o chavo kai biandilo prema e volia e manusengi murzila po chavo kai o Duo cherda te biandol, isto gia si akana.

³⁰ A ¿So phenel o Pisipe? o Pisipe phenel gia: Trade avri e esluga ta lake chave, soke o chavo e eslugako nasti avel lea zanio so si te perel e chave katar e diskinia kai inai esluga.

³¹ Goleke phlalalen, inai sam chave katar e esluga, sam chave katar goia kai inai esluga.