Galatas 3 - Biblia ande chib Romani

O pachape ta o Duo

¹ ¡Galatas, sar sai aven gia dile! ¿Ko cherda tumenge chirimata te na kanden o chachipe? Kana diam tumenge orba phendam tumenge sar mulo o Jesukristo po krusto.

² Ka puchau tumen samo iek ezgoda: ¿Tumen lien o Duo e Devleko soke cherden so phenel o zakono o soke lien e lachi viasta katar o pachape?

³ ¿Gia dile sen kai mai anglal tumaro nevo zivoto saia ande zor e Duoki ta akana mangen te zivin isto tumare zoriaia?

⁴ ¿Ni mol len niso sa e ezgode kai nakhlen? ¡nasti avelpe kai gala ezgode nakhle samo gia!

⁵ Kana o Del del tumen po Duo ta cherel ezgode Devlikane maskar tumende ¿soke cherel le? Ni cherel le soke tumen cheren so phenel o zakono, o Del cherel le soke lien e lachi viasta katar o pachape.

⁶ I o Abraam pachaia ando Del, ta goleke o Del llinda le chacho.

⁷ Goleke tumen si te llanen kai e chachuni vicha e Abraameki si e llene kai si len pachape.

⁸ Goleke ando Pisipe phenela kai mai angle o Del ka llinel chache i llenen kai pachan ta kai inai judiura, goleke phenda e Abraameke gaia lachi viasta: Sa e phuvia ka aven blagosime cheres tu.

⁹ Goleke, e llene kai pachan si blagosime e Abraamea ande iek than soke i o Abraam pachaia.

¹⁰ E llene kai lengi vera si ando zakono si proketime, soke ando Pisipe phenel: Proketo te avel o lleno kai ni cherel chachimaia sa so si pisime ando lil e zakonoko.

¹¹ Goleke niko inai llindo chacho soke cherel so phenel o zakono, soke ando Pisipe phenel: O manus chacho ka zivil cheres o pachape.

¹² A o zakono inai prema o pachape soke o zakono phenel gia: O manus kai cherel so phenel o zakono ka zivil cheres o zakono.

¹³ O Kristo braduisarda amen katar e armaia e zakonoke, ta cheres amende cherdilo proketo, soke ando Pisipe phenel gia: Proketo gua kai umblaven le pe iek kas.

¹⁴ Gua avilape gia te sai resel cheres o Kristo Jesus i kai e llene kai inai judiura o blagosipe kai o Del phendaia e Abraameke kai ka del le, ta cheres o pachape te la saurre o Duo kai o Del phenda kai ka del.

¹⁵ Phlalalen, ka dav tumenchar orba sar den orba e manusa: Kana iek lleno del po alav ta pisil po anav pe iek lil, niko nasti muril le ta niko nasti thovel ios alava pe gua lil.

¹⁶ O Del dia po alav but droma e Abraameke ta sa leke vichake. O Pisipe ni del orba katar but viche, del orba katar iek vicha kai si o Kristo.

¹⁷ Goleke o zakono e Moiseseko kai avilo star stotine ta tranda burs mai angle nasti phagel o alav kai dia o Del e Abraame.

¹⁸ A so phenda kai ka del amen o Del kana dia po alav, te avilaia istardo po zakono ni aviloia iek alav dino. O chachipe si kai so phenda o Del kai ka del e Abraame kana dia le po alav ka del le leke llabe.

¹⁹ A te si gia, ¿soke si o zakono? Avilo thodino mapalal te llangliolpe kai e manusa si bilache lligo ni ka avel goia vicha kai o Del dia la po alav. O zakono avilo dino e suechonenchar ta o Moises dia le amende.

²⁰ A kana si samo iek ni trubul niko po maskaral, ta o Del si iek.

O zakono ta o Kristo

²¹ A te si gia, ¿O zakono ta e sovel kai o Del jala kana dia po alav ni marenpe maskar pete? ¡Iok! Soke te sai diaia zivoto o zakono, avilama llinde chache cheres o zakono.

²² A prema so phenel ando Pisipe, sa e manusa si phangle ando bilachipe, ta gia gola llene kai pachan ando Jesukristo sai ka len so o Del phenda kai ka del.

²³ Mai anglal te avel o pachape, sama phangle e zakonotar ta aduricharaia te pinllara o pachape.

²⁴ O zakono inllarda amen kai o Kristo, ta cheres o pachape te ava llinde chache.

²⁵ A akana kai avilo o pachape ni trubul amen o zakono te inllarel amen kai o Kristo.

²⁶ Soke cheres o pachape ando Kristo Jesus sa tumen sen e Devleke chave,

²⁷ soke kana lien e Kristo ando kristope, achilen furiade e Kristoia.

²⁸ Ni chitilpe te san judio o griego, phanglo o mukliardo, murus o diskinia, soke e Kristoia, sa tumen sen sargo iek.

²⁹ A te sen e Kristoke, sen katar e Abraameki vicha, ta tumenge ka avel dino so o Del phenda kai ka del e Abraame.