Filipenses 4 - Biblia ande chib Romani

¹ Goleke phalalen, gachin zeliu te dikhav tumen ta voliv tumen; tumen sen mi veselia ta mo chari, llan isto gia ande zor kai del tumen o Del.

² Mangav katar e Evodia ta katar e Sintike te avel len iek mislo sargo phiorra ando Gazda.

³ A tu kai san mo chacho amal ando rado, mangav tutar te pomozi gale phiorren, soke von radisarde manchar ta phende e lachi viasta, ta i o Klemente ta ogola llene kai radisarde manchar. Lenge anava si pisime ande lila e zivotoke.

Sa so trubul te cheren

⁴ Veselin tumen ando Del suako llive. Pale phenav tumenge: ¡Veselin tumen!

⁵ Sa e llene te acharen kai tumen sen postene. O Gazda si pase.

⁶ Na brigin tumen katar niso, molintumen ta phenen sa tumare brige e Devleke. Mangen letar ta den le fala.

⁷ Ta o Del ka del tumen pi pas kai si gia bari kai o sueto nasti acharel la, ta goia pas ka arakhel tumaro lio ta tumare mislura cheres o Kristo Jesus.

⁸ Phlalalen, mislin tumen ande sa so si chachuno, so si le liubao, so si chacho ta lacho, so si posteno, sogo si pinllardo kai si lacho, sogo si lachipe kai cherel te chudi tut, mislin tumen ande sogo prilichil letar te avel blagosime.

⁹ Cheren sa so sikadem tumen; cheren sa so dikhlen kai me cherdem ta so asunden kai me phendem. Ta o Del kai del amen pi pas, ka avel tumenchar.

O Pablo del fala e llenen kai zivin ando Filipos

¹⁰ Sem but veselo ando Gazda soke dien tumen golli mandar pale. Me ni phenav kai bristrailen mandar, soke llanav kai ni diape tumenge o vreme te pomozin man.

¹¹ Ni phenaule soke trubul man vareso, soke sikilem te veseliu man sogo te avela man.

¹² Llanav so si te zivi ando chorripe, ta llanav so si te zivi i ando barvalipe.

¹³ Sai nakhav varesavo bilachipe soke o Kristo del man e zor.

¹⁴ A tumen cherden sukar kai sena manchar ande me nuzde.

¹⁵ Kana llelemtar katar e Masedonia ta iakom phenava e lachi viasta, samo tumen, e llene katar e khanlliri katar o Filipos, sena gola kai pomozisarden man.

¹⁶ Soke kana sema i ande Tesalonika mai but katar iek drom tumen bichalden mange so trubula man.

¹⁷ Me ni phenav te na den man niso; so me mangav si te avel tumen mai but angla o Del.

¹⁸ O Epafrodito dia mande sa so bichalden mange, ta akana si man mai but neko so trubula man. O pomozipe kai dien man saia mange sargo o meriso ta o taimano kai khandel sukar, iek ezgoda dini e Devleke ta o Del lel la dragostimaia.

¹⁹ Goleke, o Del ka del tumen sa so trubul tumen, katar po glamno barvalipe kai si ando Kristo Jesus.

²⁰ ¡Te avel blagosime ostade amaro Del ta i Dad! Gia te avelpe.

²¹ Phenen e llenenge kai si amare phlal ando Kristo ta sa e llenenge kai si katar o foro e Devleko kai bichalav lenge salami. E phlal kai si manchar bichalen tumenge salami.

²² Ta i bichalen lenge salami sa e llene kai si katar o santo foro, ta mai but e llene kai radin e kralioke katar e rromanura.

²³ O Gazda o Jesukristo te blagosil tumen ta te del tumen po volipe.