Filipenses 3 - Biblia ande chib Romani

E sirkunsision ta o zakono

¹ Phlalalen, veselin tumen ando Del ta ni chinivav te phenav tumenge pale so pisisardem tumenge omanglal, soke gua si te sai llal tumenge mai sukar.

² Arakhen tumen katar e llene bilache kai chinen kotora katar e esnaga,

³ soke e chachune llene kai si sirkunsidime sam amen, gola kai o Duo cherel amen te voli e Devle ta achara kai sam blagosime soke sam e Jesukristoke, ta ni uzdi amen ande so chera.

⁴ A i me sai uzdiu man ande gola ezgode. Chachimaia me sem o lleno kai mai but sai uzdiu man ande gola ezgode:

⁵ Kana biandilem ta nakhle ojto llive, cherde mange e sirkunsision. Me sem israelita katar e vicha e Benjamineki, ebreo ta chavo katar e ebreura. Me sema o lleno kai mai acharela ando zakono e judionengo ta i fariseo.

⁶ Gia zurale pachava kai mangava te zatriv e llenen katar e khanlliri; me cherava sa so phenel o zakono, ta niko nasti dosarela man katar niso.

⁷ A sa gala ezgode kai mange mola len but omanglal, akana cheres o Kristo ni mol len niso.

⁸ Nasti thove niso prema o baro lachipe kai si te pinllare e Kristo Jesuse, mo Gazda. Cheres o Kristo sa e ezgode si mange jasarde, ta sa si mange llubri te sai lau le

⁹ ta te avav pasa le, ta na llindo chacho pala o zakono; me mangav te avav llindo chacho pala o pachape ando Kristo, ta gua lale katar o Del cheres o pachape.

¹⁰ So me mangav si te pinllarav e Kristo, te acharav e zor kai saia kana ustilo katar o meripe, te nakhav leki patnia ta te merav sargo vou,

¹¹ ta voliva te ustav katar o meripe.

Ka resa mai angle

¹² Galea me ni phenav tumenge kai me liem sa gala ezgode, ta ni phenav tumenge kai inai man ni iek bilachipe. Llau angle ta mangav te avav gia, soke o Kristo Jesus reslo mande mai anglal.

¹³ Phlalalen, me ni phenav kai liem le. So cherav si kai bristarav man katar so achilo palpale ta trudiu man te resav so si angle,

¹⁴ te resav kote kai mangav ta te dobiu o chari katar o miloso kai o Del ikharda amen te la cheres o Kristo Jesus.

¹⁵ Sa gola kai sam mai bare ando pachape morabi te misli amen gia. A vareko tumendar te avela le aver mislo kai inai sargo amaro, o Del ka sikavel le i gua.

¹⁶ A morabi te zivi prema so liam llik kate.

Katar o miloso sam

¹⁷ Phlalalen, cheren prema so cherav me ta dikhen i pe llene kai zivin prema sar sikadam len amen.

¹⁸ But droma phendemle tumenge, ta akana phenaule tumenge pale rovindo, si but llene kai zivin sargo dusmanura katar o krusto e Kristoko,

¹⁹ ta von si te jasaon. Lengo del si o jape, ta cheren baripe ande so saia te avel lenge lallao. Samo mislinpe ande ezgode gale suetoke.

²⁰ A amen sam katar o miloso ta adurichara te avel katar o miloso o Braduimari, o Gazda Jesukristo,

²¹ kai ka pharruvel amari esnaga lallaimaki te avel blagosime sargo leki esnaga. Ta ka cherel le e zoriaia kai si le pe sa e ezgode.