Filemon 1 - Biblia ande chib Romani

Salami

¹ Me o Pablo phanglo katar o Kristo Jesus ta o phlal o Timoteo bichala salami chuke Filemon kai pomozi amen ande gaia buchi.

² Ta e khanllirake kai chidiniaol ande cho cher, ta i e phiorrake e Apiake ta e Arkipoke, amaro phlal ande gava rado.

³ O Del kai si amaro Dad, ta o Gazda o Jesukristo te den tumen po volipe ta pi pas.

O Pablo molilpe pala o Filemon

⁴ Suako drom kana moliv man dav man golli tutar Filemon, ta dav fala me Devle cheres tu.

⁵ Soke phende mange katar o volipe ta o pachape kai si tut pala o Gazda o Jesukristo ta i pala sa e llene kai si katar o foro santo.

⁶ Ta mangav e Devletar te lla angle che pachamaia ta te pinllare sa o lachipe kai sai chera pala o volipe kai si amen pala o Kristo.

⁷ Sem but veselo katar cho volipe. Soke tu phlala pherdan volipe o lio e llenengo kai si katar o foro e Devleko.

O Pablo del orba pala o Onesimo

⁸ Goleke i te avela man o gazdaripe ando anav e Kristoko te phenav chuke so morabi te chere,

⁹ si mange mai sukar te mangavle tutar ando anav katar o volipe. Akana me o Plablo kai sem phuro ta sem phanglo cheres o Kristo Jesus,

¹⁰ mangav tutar te chere iek sebapi me chaurreke o Onesimo, kai akana sem sargo leko dad soke me phendem leke e lachi viasta kate ande rubie.

¹¹ Omanglal o Onesimo saia chuke iek sluga bilacho, a akana trubul tut ta i man.

¹² Bichalav le chuke pale: vou si sargo mo chaurro.

¹³ Mange avilaia drago vou te achiloia kate manchar, te sai pomozil man po than chiro so me sem phanglo cheres e lachi viasta.

¹⁴ A me ni kamam te cherav niso kai inai prema chi volia, ta te sai chere mangav gua sebapi tu tutar ta te na cherele pe zor.

¹⁵ Sai avelpe kai o Onesimo durilo tutar nesavo vreme te sai akana avel tuia ta nikada te na llaltar,

¹⁶ ta akana te na avel sargo iek sluga, te avel mai but neko iek sluga. Te avel, sargo iek phlal kai voli. Me voliv le but, a tu morabi te voli le ios mai but, na samo sargo iekhe manuse, morabi te voli le i sargo iekhe phlale ando Gazda.

¹⁷ Goleke te sem chuke iek phlal ando pachape, le le sargo te le isto man.

¹⁸ A Te cherda chuke varesavo bilachipe o Onesimo, o te si chuke vareso unllile, me ka pochinaule.

¹⁹ Me o Pablo pisiv gala ezgode me vastea: Me ka pochinav. A saia te na pochinav chuke niso soke tu san mange unllile cho zivoto.

²⁰ Ea phlala, mangav tutar gava sebapi pala o volipe e Gazdako; cher te avel man gaia dragostia ande mo lio sar sam phlal ando Kristo.

²¹ Pisiu chuke soke llanav kai san iek lleno kai kande, ta llanav kai ka chere ios mai but neko so mangav tutar.

²² Ta lachar mange iek than kai te sovav; soke aduricharav te asunel o Del tumaro molipe kai cheren pala ma, ta te likau katar o phandipe te llau te dikhav tumen.

Salami

²³ Bichalel chuke salami o Epafras kai si manchar ando phandipe cheres o Kristo Jesus,

²⁴ ta i o Markos bichalel chuke salami, ta i o Aristarko ta o Demas ta o Lukas, von si kai pomozin man ande gaia buchi.

²⁵ O Gazda o Jesukristo te del tumen po volipe.