Ester 9 - Biblia ande chib Romani

E judiura dobin

¹ Ando llive desutrin katar o chon desudui kai ikhardol Adar, e judiura saia te cheren so phenda o charo, ta ande gua llive lenge dusmanure saia te zatrin len, a avilape aver ezgoda, soke e judiura zatrisarde len.

² Ande sa e phuvia katar o charo Asuero kaigo zivina e judiura, chidiniaona te marenpe e llenenchar kai mangena te cheren lenge o bilachipe. Ta niko ni marelape lenchar soke sa e forura darana lendar.

³ Sa e sudura ta e llene kai gazdarina ande phuvia ta ande forura, pomozina e judionen soke darana katar o Mardokeo,

⁴ soke vou saia iek manus glamno ando cher e charoko, ta cherdola sa mai asundo ande suako phuv, ta suako llive saia le mai but gazdaripe.

⁵ E judiura mundarde e jarnienchar sa pe dusmanonen, zatrisarde saurren, ta cherde lenchar sogo mangle.

⁶ Samo ando foro Susa mundarde panch stotine llenen,

⁷ ta i avile mundarde o Parsandata, o Dalfon, o Aspata,

⁸ o Porata, o Adalia, o Aridata,

⁹ o Parmasta, o Arisai, o Aridai ta o Vaizata,

¹⁰ kai sea e des chave e Amaneke, o dusmano e judionengo, a lenge ezgode ni lie len peke.

¹¹ Isto gua llive, kana o charo llangla gachine llenen mundarde e judiura ando foro Susa,

¹² o charo phenda e Estereke e charoina: E judiura mundarde panch stotine llenen ta i e dese chaven e Amaneke ando foro Susa. ¡So ni cherde ande ogola phuvia! ¡Phen so ios mange, ta me ka cherav le!

¹³ Ta e Ester phenda leke: Te mangea tu, muk e judionen katar o foro Susa, te cheren thiara isto so cherde allive prema o lil, ta te umblaven pe sole e esnage katar e des chave e Amaneke.

¹⁴ Ta o charo phenda te cheren le gia. O lil sikadilo ande Susa, ta umblade e esnage katar e des chave e Amaneke.

¹⁵ E judiura kai zivin ande Susa pale chidinaile ando llive desustar katar o chon Adar, ta kote mundarde trin stotine llenen, a ni lie peke lenge ezgode.

¹⁶ Ta e judiura kai zivina ande ogola phuvia chidinaile te marenpe pala po zivoto ta te kurtulinpe katar pe dusmanura, mundarde eftavardes ta panch milie llenen, a ni lie peke lenge ezgode.

¹⁷ Gala ezgode nakhle ando llive desutrin isto katar o chon Adar. Ta ando llive desustar achile ta cherde iek baro jape, ta saia but veselia.

¹⁸ A e judiura kai chidinailea ande Susa e llivesa desutrin ta desustar, ta ando llive desupanch achile, ta i von cherde iek baro jape ta saia but veselia.

¹⁹ A e judiura kai zivina ande forura ta forichura kai ni saia len zidura truial, cherde le ando llive desustar katar o chon Adar, ta ande veselia ta dragostia dena ezgode iek avere.

E slava katar o Purim

²⁰ O Mardokeo pisisarda sa gala ezgode kai nakhle, ta bichalda lila kai sa e judiura kai zivina ande phuvia kai charoila o charo Asuero, golenge kai sea pase, ta i golenge kai sea dur,

²¹ ta phenda te avel veselia suako burs ande llivesa desustar ta desupanch katar o chon Adar,

²² sargo ande llivesa kana e judiura kurtulisaile katar pe dusmanura, ta gia sar isto ande iek chon e zalba cherdili veselia. Gala llivesa trubul te cherdol baro jape, te avel veselia, te den ezgode iek avere, ta te pomozin e chorren.

²³ E judiura sikadile te cheren gala ezgode gia sar pisisarda lenge o Mardokeo.

²⁴ Soke o Aman, chavo katar o Amedata katar e vicha katar o Agag, o dusmano sa e judiunengo, mangela te zatril len kana cheldape te dikhel kana ka mundarel len ta te zatril len,

²⁵ a kana e Ester lleli kai o charo, vou phenda ta pisisarda te perel pe Amaneko soro sa o bilachipe kai mangela te cherel e judionenge, goleke umblade e Amane ta leke chaurren.

²⁶ Goleke gala llivesa ikhardon Purim, kai avel katar o alav Pur. Ta gia prema so phenela o lil kai cherda o Mardokeo, ta prema so dikhle, ta so sikile,

²⁷ e judiura mukle peke gala llivesa ta pe porodoke, ta sa e llenenge kai cherdona judiura: Ka cheren le suako burs, ta ni ka jasaren ni iek katar gala dui llive gia sar pisisarda tumenge o Mardokeo,

²⁸ ta te denpe golli ta te veselinpe ande gala llivesa e chaurrenge chaurre, ande suako familia, phuv ta foro, ta gia te na jasaon e llivesa katar o Purim ta te achel ando mislo katar e judiura ta katar lengo porodo.

²⁹ E charoina Ester, chei katar o Abiail, ta o judio Mardokeo, pisisarde gazdarimaia iek duito lil kai dela orba katar e slava katar o Purim, te sai del zor ogole lile kai pisisardaia o Mardokeo.

³⁰ Ta bichalde le ande alava pachivale kai sa e judiura katar stotina ta bis ta efta phuvia e Asueroke.

³¹ Ando lil phenela kai morabi te cheren e slava katar o Purim ande llivesa kai phendaia o Mardokeo ta e charoina Ester, te cheren le von ta lengo porodo. Ta i thode aver sakonura katar o alluno ta katar o roipe,

³² ta so phenda e Ester chacharda ezgode kai saia te cheren pe slava katar o Purim. Ta sa gala ezgode pisisaile ande iek lil.