Ester 5 - Biblia ande chib Romani

E Ester llal kai o charo

¹ Nakhle trin llive, ta e Ester furiadili ande patave charoinake ta dia ande bar kai si andre ando cher e charoko, ta achili angla e soba kote kai besela o charo pe po trono, kai saia angla o udar.

² Samo so dikhla o charo e Estere ande bar, avilo laia pachivalo ta inzarda angla la pi rovli sunakuni kai saia ande leko va. A e Ester avili pasa le ta dodisarda iek rig katar leki rovli.

³ Ondaka o charo puchla la: ¿So si chuke charoina Ester? ¿So mange? ¡I te mangea mandar dopas katar mi charoina, me ka dav la chuke! A e Ester phenda leke:

⁴ Charo, avilem te mangav tutar te lla te bese pe sinia, soke cherdem iek jape ande cho anav, ta phen te anen i e Amane. Ondaka o charo phenda:

⁵ Roden isto akana e Amane, te cherav so mangel e charoina Ester. Ta gia o charo ta o Aman llele te besen pe sinia kai thoda e Ester.

⁶ Ta kana besena pe sinia, o charo phenda e Estereke: ¡Mang nandar sogo kamea kai me ka dav le chuke, i te mangea mandar dopas katar mi charoina!

⁷ A e Ester phenda: So mangav si samo gaia ezgoda:

⁸ Charo, te volia man ta te mangea te chere so me mangav, lla thiara ta phen te llal tuia o Aman, soke mangav te cherav aver jape ande cho anav. Ta ondaka ka cherav so tu mange.

O Aman lacharel o than te mundaren e Mardokeo

⁹ O Aman llelotar katar e sinia but veselo, a pherdilo joli kana dikhla e Mardokeo kai saia po udar katar o cher e charoko, ni ustela ta ni miskolape kana dikhla le kai nakhel.

¹⁰ A o Aman, ni sikada pi joli, ta kana avilo kai po cher ikharda pe amalen ta pe rromia e Zerese,

¹¹ ta dia lenchar orba katar po baro barvalipe ta kai sea le but chaurre, ta sar o charo dia le liubao maskar e llene kai radina ta e llene kai pomozina e charo, ta sar dia le iek rado mai lacho neko sa ogolen.

¹² Ta i phenda lenge gia o Aman: Me sem o edino kai e charoina Ester ikharda po jape kai allive cherda e charoke, ta ikharda man pe aver jape kai ka cherel leke thiara.

¹³ A kana me dikhav pe gua judio o Mardokeo, kai besel po udar katar o cher e charoko, sa gala ezgode ni mol len niso mange.

¹⁴ Ondaka leki rromi ta leke amala phende leke gia: Phen te lacharen iek than vazdino bis ta dui pole upre ta te phanden iek solo te unblaven e Mardokeo, ta thiara rano mang katar o charo te umblavel le pe gua solo. Ta gia sai ka lla e charoia po jape veselimaia. Gaia orba avila drago e Amaneke, ta phenda te cheren le.