Ester 3 - Biblia ande chib Romani

O Mardokeo ta o Aman

¹ Kotar nakhlo nesavo vreme, ta o charo Asuero cherda te avel baro o Aman, chavo katar o Amedata, kai saia katar e vicha katar o Agag, ta cherda te gazdaril pe sa e gazda katar e charoke phuvia.

² Sa e llene kai radina e charoke ande leko cher bangona ta dena changa kana o Aman nakhela o kana sea angla le, soke o charo phendaia te cheren le gia. A o Mardokeo ni kamla te cherel so phendaia o charo.

³ Ondaka e llene kai radina e charoke puchle e Mardokeo soke ni kandela so phendaia o charo.

⁴ Ta suako llive puchena le isto gua, ta sar vou ni phenela niso, llele te phenen le e Amaneke te dikhen dal o Mardokeo ni ka phenel kai saia judio, soke lenge phendaia le.

⁵ Ta kana o Aman dikhla kai o Mardokeo ni bangola ta ni dela changa kana vou nakhela, jolailo zurale.

⁶ A sar phendea leke katar savi vicha saia o Mardokeo, ni kamla te dukhavel samo le, ta thoda te mislilpe sar ka zatril sa e judionen kai zivina ande forura kai charoila o charo Asuero.

O zakono te zatrin e judionen

⁷ Ando purvo chon katar o burs, kai si o chon o Nisan, ta ando desuduito burs kai charoila o Asuero, cheldepe angla o Aman te dikhen ande savo llive ta chon ka cheren so vou phendaia. Ta likisto o llive desutrin katar o chon desudui, kai si o chon o Adar.

⁸ Ondaka o Aman phenda e Asueroke gia: Maskar sa e forura kai si ande phuv kai charoi, si iek kai si fulado ogolendar, si le zakonura kai inai sargo katar ogola forura, ta ni kanden tut. Avela mai sukar te na zivil gava foro ande phuvia ta ande forura kai tu gazdari.

⁹ Goleke, te mangea tu, ka pisilpe iek zakono kai phenel te aven mundarde sa e llene katar gava foro, ta me ka dav trin stotine ta tranda milie kile rup te thoven len ando barvalipe e charoko.

¹⁰ Ondaka o charo ikanda pi angrusti ta dia la kai o Aman chavo e Amedatako katar e vicha katar o Agag, gua kai murzila pe judiura,

¹¹ ta phenda leke: Te kamea, le o rup. Ta gole foroia cher so tu mangea.

¹² Ando llive desutrin katar o purvo chon e burseko, ikharde e llenen kai pisina. Ta pisisarde so mangela o Aman te cheren e llene kai gazdarina ande forura ta e sudura katar suako phuv. Gava lil pisisarde le ande chib prema sar pisina ande suako foro. Pe gava lil saia o anav e charoko ta o sello katar leki angrusti.

¹³ Ta bichalde le kai sa e phuvia e charoke. Ta ande lila phenela kai saia te mundaren ande iek llive sa e judionen, avena phure o terne, minone o diskinie, ta te len sa lenge ezgode. Ta saia te cheren le ando llive desutrin katar o chon desudui, kai si o chon o Adar.

¹⁴ Iek lil isto sargo gua, sikadilo e llenenge sargo zakono ande sa e phuvia ta forura, te sai aven lacharde gole lliveseke.

¹⁵ Ta o charo phenda te bichalen oma gava lil, ta o lil sikadilo ando foro Susa. Ta kana o charo ta o Aman besena pe sinia te jan ta te pien, ande Susa saia iek bari burkania.