Esdras 9 - Biblia ande chib Romani

O bilachipe e foroko

¹ Kana nakhle gala ezgode, e gazda avile mande ta phende mange: O foro katar o Israel, e popura ta e levitura, ni fuladile katar e llene e phuviake, katar e kananeura, katar e jititura, katar e ferezeura, katar e jebuseura, katar e amonitura, katar e moabitura, katar e ejipsiura ta katar e amorreura, a gola llene si sikade te cheren ezgode kai inai Devlikane.

² A von ta lenge chave zinisaile lenge cheenchar, ta o foro e Devleko amisailo e llenenchar katar aver forura. Ta e purve llene kai cherde gava bilachipe sea e gazda, e popura ta gola kai pomozin len.

³ Kana asundem gaia orba, pharradem pe mande me patave, chirdiem me bal ta me chor te dikhen mi duk, ta beslem pe phuv pherdo zalba.

⁴ Sa e llene kai darana katar e alava e Devleke katar o Israel pala o bilachipe kai cherde e llene kai sea phangle ta irisaile, avile pasa ma, a me achilem isto kote besindo ta pherdo zalba llik pasa e riat kana cheren o kurbano.

⁵ Ondaka liape mandar e zalba, ta isto e patavenchar kai pharradem pe ma diem changa, vaziem me va karing o Del,

⁶ ta phendem: ¡Devla, Devla! Merav lallaimatar, ni llanav so ka phenav chuke. Amaro bilachipe si but baro, ta amari dos resli llik kai o miloso.

⁷ Cheren but burs ta llik allive, amen zivi ande iek baro bilachipe. Isto pala amaro bilachipe, amen, amare charura ta e popura, avilam dine te gazdarin pe amende aver phuvia. Marde amen, tradie amen, chorde amen, chudie amen, ta isto gia sam akana.

⁸ A tu Gazda, kai san amaro Del, pala cho volipe muklan cherricha vreme te achen amen nesave llene mukliarde, ta te zivi pe gaia phuv bi darako ande cho santuario, tu dian amen iek vlaga nevi, ta dian amen e veselia pale ande amaro zivoto kai sam sluga.

⁹ Makar sam sluge, tu ni muklan amen, sikadan amenge cho volipe angla e charura katar e Persia, dian amen zivoto te vazda pale cho cher maskar leko phagipe, ¡Arakhlan amen ando Juda ta ando Jerusalem!

¹⁰ Devla, ¿so sai phena akana kai amen cherdam gachin bilachipe? Ni cherdam so phenen che zakonura,

¹¹ kai muklan te sikaven amen che sluge e poraukura. Tu phendan amenge kai o foro kai ka da andre ta kai ka la le amenge, saia makhlo ando bilachipe kai cherena e llene kai zivina kote, ta sea sikade ande ezgode kai inai Devlikane, ta pherde sa goia phuv pe bilachimaia.

¹² Ta i phendan amenge te na zini amare cheen lenge chavenchar, ni te muka te zininpe lenge chea amare chavenchar, ta te na roda lenge te aven ande pas, ta gia amen ka ava zurale ta ka la so del e phuv ta ka muka la amare porodoke, ta gaia phuv te achel amare chavenge ostade.

¹³ Gachin ezgode kai nakhlam pala amaro bilachipe ta pala amari dos, a tu Devla, ni dian amen e patnia kai saia te la, ta muklan nesave llenen te zivin amenchar.

¹⁴ ¿Sai te na kanda pale so phenen che zakonura, ta te zini amare cheen ta amare chaven gole llenenchar kai cheren gachin bilachipe? ¿Te avelpe gia, ni joliaoa ta ni zatria amen, ta ni mukea ni iekhe llundo?

¹⁵ Gazda, kai san o Del katar o Israel, tu avilan chacho amenchar, tu muklan nesave llene amendar te zivi, gia sar dikhol allive. Ta chachimaia amen sam dosale angla tu, goleke nasti ava tute palagaia ezgoda.