Esdras 8 - Biblia ande chib Romani

E llene kai irisaile katar e Babilonia

¹ Gala si e gazda katar e familie kai si pisime ande lila katar suako familia kai irisaile katar e Babilonia e Esdrasea, kana charoila o Artajerjes:

² O Gerson, katar o porodo e Fineeseko, o Daniel, katar o porodo e Itamareko, o o Jatus, katar o porodo e Davideko,

³ o Zakarias ta stotine ta pinda murusa kai sea porodo katar o Sekanias ta sea pisime ande lila. Katar o porodo e Paroseko,

⁴ o Elieoenai, chavo katar o Zeraias, katar o porodo katar o Pajat Moab, kai sea lea dui stotine murusa,

⁵ o chavo katar o Jajaziel, katar o porodo e Sekaniaseko, kai sea lea trin stotine murusa.

⁶ O Ebed, chavo katar o Jonatan, katar o porodo e Adineko, kai sea lea pinda murusa,

⁷ o Jesaias, chavo katar o Atalias, katar o porodo e Elameko, kai sea lea pinda murusa,

⁸ o Zebadias, chavo katar o Mikael, katar o porodo e Sefatiaseko, ka sea lea ojtovardes murusa,

⁹ o Abdias, chavo e Jejieleko, katar o porodo e Joabeko, kai sea lea dui stotine ta desojto murusa,

¹⁰ o chavo katar o Josifias, katar o porodo o Selomiteko, kai sea lea stotina ta sovardes murusa,

¹¹ o Zakarias, chavo katar o Bebai, katar o porodo e Bebaieko, kai sea lea bis ta ojto murusa,

¹² o Joanan, chavo katar o Akatan, katar o porodo e Azgadeko, kai sea lea stotina te des murusa,

¹³ O Elifelet, o Jejiel ta o Semaias, o mai terno porodo e Adonikameko, kai sea lea sovardes murusa. Von irisaile mapalal.

¹⁴ O Utai ta o Zabud, katar o porodo e Bigvaieko, kai sea lea eftavardes murusa.

E llene kai radina ando cher e Devleko

¹⁵ Me o Esdras, chidiem len saurren pasa e lenorri kai del ande len Aava, ta loglam ta achilam kote trin llive. Ta kana rodiem maskar e llenen ta maskar e popura, ni maladem ni iek levita.

¹⁶ Ondaka bichaldem te llal o Elier, o Ariel, o Semaias, o Elnatan, o Jarib, o Elnatan, o Natan, o Zakarias ta o Mesulam, kai sea llene glamne, ta i o Joiarib ta o Elnatan, kai sea but bizai.

¹⁷ Ta phendem lenge te llan kai o Ido kai si gazda katar o than kai ikhardol Kasifia, ta te phenen e Idoke ta e llenenge kai sea lea kai radina ando cher e Devleko ta kai sea ande Kasifia, te anen amenge llenen te pomozin amen ando cher amare Devleko.

¹⁸ Ta da fala e Devle soke ande amenge e Serebiase kai llanela but, vou saia porodo katar iek levita kai ikhardola Majli chavo katar o Israel, ta avilo pe chavenchar ta pe phlalenchar, kai sea desojto llene.

¹⁹ Ta ande amenge e Jasabiase ta e Jesaiase, kai sea porodo katar o Merari. Vou avilo pe chavenchar ta pe phlalenchar kai sea bis llene.

²⁰ Katar e llene kai omanglal o David ta e gazda thodaia len te radin e levitenge, sea dui stotine ta bis llene, ta thode len te radin ando cher e Devleko prema lenge anava.

²¹ Mapalal phendem te cherdol iek alluno pasa e len kai ikhardol Aava, te sai phena amaro bilachipe amare Devleke, ta te arakhel amare familia ta amare ezgode po drom kai iri amen ando Jerusalem.

²² Ta lallailem te mangav katar o charo te bichalel amenchar boñikura pe gra te arakhen amen katar o dusmano e dromea, soke amen phendam e charoke kai o Del arakhel e llenen kai roden le, ta kai mukliarel pi zor ta pi joli pe llene kai muken le.

²³ Goleke cherdam o alluno ta molisailam e Devleke pala gala ezgode, ta vou dikhla pe amende.

²⁴ Mapalal thodem pe iek rig desudui katar e popura kai gazdarina: O Serebias, o Jasabias ta des ios kai radina lea.

²⁵ Ta phariadem ta diem lende o rup, o sunakai ta e ezgode kai gurudaia o charo ta e llene kai pomozina le ta leke sudura ta sa e israelitura te sai den len kai o cher katar amaro Del.

²⁶ Diem lende bis ta iek milie ta star stotine ta pinda kile rup, stotina ezgode rupune, ta trin milie ta trin stotine kile sunakai,

²⁷ ta i bis tasura bare sunakune kai sa chidine phariavena ojto kile, ta dui ezgode cherde katar o tuch mai lacho kai klichil, kai si kuch sargo sunakai.

²⁸ Mapalal phendem lenge: Tumen sen chinade te blagosin e Devle, isto sargo gala ezgode, o rup ta o sunakai kai si dine e Devleke, o Del katar amare purane.

²⁹ Prezon ta arakhen len lligo ni ka phariaven len angla e gazda katar e popura, ta angla e levitura ta angla e gazda katar e familie katar o Jerusalem.

³⁰ Ondaka e popura ta e levitura lie o rup, o sunakai ta e ezgode kai phariadea len, ta inllarde len ando cher e Devleko kai si ando Jerusalem.

³¹ Ando llive desudui katar o purvo chon llelamtar katar e len Aava karing o Jerusalem. Amaro Del arakhla amen e dromea katar e dusmanura ta katar e kochkaria.

³² Kana avilam ando Jerusalem kote achilam trin llive te lelpe amendar o chiñipe.

³³ Ando starto llive phariade o rup, o sunakai ta e ezgode ando cher e Devleko, ta diam len sa kai o popo o Meremot, chavo katar o Urias. Ta lea saia o Eleazar, chavo katar o Fines, ta e levitura o Jozabad, chavo katar o Jesua, ta o Noadias, chavo katar o Binui.

³⁴ Isto gua llive phariade ta llinde sa, ta pisisarde pe iek lil sa so andam.

³⁵ Mapalal, e llene kai sea phangle ta irisailea, ande te den kurbanura phabarde e Devleke katar o Israel, ando anav katar sa e israelitura, desudui guruvorra, iniavardes ta sov bakre purane, eftavardes ta efta bakre ta desudui busne e kurbanoke pala o bilachipe. Sa gala kurbanura phabarde len te blagosin e Devle.

³⁶ Mapalal, o lil kai bichalda o charo die le kai leke sudura ta kai e llene kai gazdarin pe ogoia rig katar e len Eufrates, ta von cherde o lachipe pala o foro ta pala o cher e Devleko.