Esdras 7 - Biblia ande chib Romani

O Esdras ta leke amala aven ando Jerusalem

¹ Mapalal katar sa gala ezgode, kana charoila o Artajerjes charo katar e Persia, saia iek lleno kai ikhardola Esdras, kai saia porodo katar o Seraias, katar o Azarias, katar o Jilkias,

² katar o Salum, katar o Sadok, katar o Ajitob,

³ katar o Amarias, katar o Azarias, katar o Meraiot,

⁴ katar o Zeraias, katar o Uzi, katar o Buki,

⁵ katar o Abisua, katar o Finees, katar o Eleazar ta katar o Aaron, o purvo popo.

⁶ O Esdras saia kovachi ta llanela but katar o zakono kai o Del dia kai o Moises, ta o Del pomozila e Esdrase, ta o charo Artajerjes dia le sogo mangla letar.

⁷ Ondaka o Esdras irisailo katar e Babilonia ando Jerusalem ando eftato burs kai charoila o Artajerjes, ta avile lea nesave israelitura katar e popura, katar e levitura, katar e llene kai llilabena, katar e llene kai arakhena e udara ta gola kai radina ando cher e Devleko.

⁸ O Esdras avilo ando Jerusalem ando panchto chon katar o eftato burs e charoko.

⁹ O Esdras saia ande va pachivale e Devleke, ta likisto katar e Babilonia ando purvo llive katar o purvo chon katar o eftato burs kai charoila o Artajerjes, ta avilo ando Jerusalem ando purvo llive katar o panchto chon isto katar gua burs.

¹⁰ Ta o Esdras thoda ande po lio te chitil ta te cherel so phenel o zakono e Devleko, ta te sikavel e israelitonen e zakonura ta o sikadipe.

¹¹ Gava si o lil kai o charo Artajerjes dia kai o Esdras, popo ta kovachi sikado ande sa e alava kai o Del dia e Israele:

¹² O charo Artajerjes, bichalel baj ta sastipe e Esdraseke, popo kai llanel but katar zakono katar o Del e milosoko.

¹³ Me phendem kai trubul te cheren gaia ezgoda: Varesavo israelita kai si ande phuv kai charoiu, te mangela te llaltar katar o Jerusalem, sai llaltar tuia, i te avela levita o popo.

¹⁴ Soke o charo ta e efta llene kai pomozin le, bichalen tut te dikhe so llalpe ando Juda ta ando Jerusalem, prema o zakono e Devleko kai si ande cho va.

¹⁵ Ta inllar tuia o sunakai ta o rup kai dia o charo ta e llene kai pomozin le von petar e Devle katar o Israel,

¹⁶ ta inllar sa o sunakai ta o rup kai sai chide ande sa e phuv katar e Babilonia, ta so mangena te den e llene katar o foro ta e popura, ta an le ando cher e Devleko kai si ando Jerusalem.

¹⁷ Ta gole lovenchar trubul te chine guruvorra, busne ta bakre. Ta ka de simiche ta mol, ta ka thoven len po altar kai si ando cher katar tumaro Del ando Jerusalem.

¹⁸ A katar o sunakai ta o rup kai ka achel, sai chinen lenchar aver ezgode prema so mangela o Del.

¹⁹ A e ezgode kai die tute te blagosin lenchar e Devle ande leko cher, de len isto tu kai o Del katar o Jerusalem.

²⁰ Ta sogo trubula te de kai o cher che Devleko, sai le katar e ezgode gurudine kai si ande sobe e charoke.

²¹ Ta me, o charo Artajerjes, phenav sa e llenenge kai arakhen e love ande phuv kai si pe ogoia rig katar e len Eufrates, kai morabi te den kai o Esdras, popo ta kovachi sikado ando zakono katar o Del e milosoko, sogo ka mangel tumendar,

²² llik trin milie ta trin stotine kile rup, des milie kile lliu, dui milie ta dui stotine litrura mol, dui milie ta dui stotine litrura zeitino ta sa o lon kai mangena.

²³ Sogo ka mangel o Del e milosoko pe chereke, trubul te delpe oma, te na avel ni iek joli e Devleki pe charoke chaurre ta pe leko gazdaripe.

²⁴ Ta trubul te llanen kai nasti mangen love e foroke katar ni iek popo, ni katar e levitura, ni katar e llene kai llilaben, ni katar e llene kai arakhen e udara, ni katar e llene kai radin ando cher e Devleko, ta ni katar ni iek lleno kai radil ando cher e Devleko.

²⁵ A tu, Esdras, prema e ezgode kai sikada tut o Del, thov krisaria ta llenen te gazdarin ta te cheren so si orta e llenenchar kai si ande phuv kai si pe ogoia rig katar e len Eufrates ta sa e llenenge kai pinllaren o zakono che Devleko, ta gola kai ni pinllaren le sikav len.

²⁶ Ta kogo ni cherela so phenel o zakono katar cho Del ta e zakonura katar o charo, trubul te cheren iek kris ta te chinen leke te merel, o te chuden le katar e phuv, o te pochinel o te phanden le.

O Esdras molilpe

²⁷ Ondaka o Esdras molisailo: Blagosime te avel o Del katar amare purane, kai cherda e charo te blagosil o cher e Devleko ando Jerusalem,

²⁸ soke sikada mange kai si lacho angla o charo ta angla e llene kai pomozin le, ta angla e llene mai glamne katar leki kris, ta dia man zor ta pomozisarda man te chidav e llenen mai glamne katar e judiura ta te anav len manchar.